د کرنې وزیر په افغانستان کې د ایران له سفیر سره وکتل

د افغانستان اسلامي امارت د کرنې، اوبو لګولو او مالدارۍ وزیر مولوي عطاءالله عمري، د خپل کار په دفتر کې په افغانستان کې د ایران اسلامي جمهوریت له سفیر علي رضا بیکدلي سره وکتل.

په دې لیدنه کې دواړو لوریو د کرنې، مالدارۍ، سوداګرۍ او د دواړو هېوادونو د خصوصي سکتور ترمنځ د همکاریو د پراختیا پر اړتیا ټینګار وکړ. د کرنې وزیر وویل: «زموږ دنده خلکو ته د سالمو خوړو برابرول دي او د همکاریو اساسي موخه، په ځانګړي ډول له خصوصي سکتور سره، د سوداګریزو اړیکو پراخول او د شته توافقاتو عملي کول دي.»
همدارنګه د ایران سفیر علي رضا بیکدلي وویل: «هوکړې  د پلان او ټاکلي مهال‌وېش له مخې تعقیب او عملي کېږي او د کرنې او مالدارۍ له لارې به له افغانستان سره قوي اړیکې ټینګې شي.»
د دې لیدنې په څنډه کې، علي رضا بیکدلي د هېواد د کرنې، اوبو لګولو او مالدارۍ وزیر ته په تهران کې د اقتصادي همکاریو سازمان (ECO) په غونډه کې د ګډون بلنه ورکړه، چې په یاده غونډه کېد غړو هېوادونو د کرنې وزیران ګډون کوي.