د کرنې وزیر د کندهار له والي سره په کته کې: په کندهار کې د کرنې پر پرمختیا او د پانګونې پر ملاتړ خبرې اترې وکړې
۲ مرغومی ۱۳۹۸
د کرنې، اوبولګولو او مالدارۍ وزیر نصیراحمد درانی د خپل کار په دفتر کې د کندهار له والي حیاتالله حیات سره وکتل.
په دې لیدنه کې دواړو خواوو په کندهار کې د کرنې پر پرمختیا او د پانګونې پر ملاتړ خبرې اترې وکړې.
د سړوخونو جوړول، د «فوموګیشن» یا د صادراتي محصولاتو د تدخین مرکز جوړول، د چرګانو روزنې په برخه کې پانګونه، د خصوصي سکټور پانګونې لپاره د «ترنک» فارم له ځمکو ګټه اخیستنه، ۵۰۰۰ مټریک ټني سړه خونه بیا فعالول چې، مخکې په کندهار کې جوړه شوې وه، په دې لینده کې د کندهار د والي د خبرو اترو محور و.
په دې لیدنه کې دکرنې وزیر نصیر احمد درانی د کندهار والي ته وویل، چې سږکال په کندهار کې د کرنیزو محصولاتو لپاره د «فومو ګیشن» یا تدخین مرکز جوړوو، بڼوالو لپاره ۵۰ ممیزخونې جوړو او دغه راز په کندهار کې د چرګانور روزنې شپږ لوی فارمونه جوړوو.
د کرنې وزیر وویل، د سړوخونو د جوړولو په برخه کې وزارت چمتو ده، چې د ۵۰۰ مټریک ټني سړوخونو ډیزاین د خصوصي سکټور په واک کې ورکړي او په تخنیکي برخه کې له دوی سره همکاري وکړي.
ښاغلی درانی وویل، په هغه صورت کې چې خصوصي سکټور د قناعت وړ طرح جوړ کړي، د کرنې وزارت چمتوده چې د ښارجوړوني او ځمکو وزارت په همغږۍ ددې وزارت اړونده ځمکې د دوی په واک کې ورکړي.
په کندهار کې د چرګانو حلالولو د ځایونو ایجاد لپاره تخنیکي همکارۍ، په دې لیدنه کې د کرنې وزیر د خبرو بله برخه وه.
ښاغلی درانی له خصوصي سکټور سره ژمنه وکړه، په هغه صورت کې چې د دوی طرحې د قناعت وړ وي او له بهره د محصولاتو د واردولو د کچې د ټېټولو لامل شي، چمتو ده چې له دوی سره هر اړخیزې همکارۍ وکړي.
د کندهار والي د کرنې وزیر د هر اړخیزو همکاریو ستاینه وکړه.
