د کرنې وزارت پلاوي د هلمند ولایت د کرنې رییس سره ناسته وکړه
۲۱ لېندۍ ۱۴۰۳ه.ش
۱۰ جُمَادَى الثاني۱۴۴۶ه.ق
د کرنې، اوبولګولو او مالدارۍ وزارت څخه راغلي پلاوي چې مشري یې د ځمکو د اصلاح او زهکشۍ رییس مولوي شېرمحمد حاتمي کوله، د هلمند ولایت کرنې رئیس الحاج مولوي نیازمحمد وهاج سره د هغه په دفتر کې ناسته وکړه.
د راغلي پلاوي مشر مولوي شېرمحمد حاتمي وویل: چې د کرنې وزارت د پراختیايي بودیجې له لارې غواړي په هلمند کې د اوبو تنظیم او مدیریت په موخه پروژې پلي کړي. هغه زیاته کړه چې د یادو پروژو د تطبیق لپاره، د کرنې ریاست سره په همغږۍ کار ترسره کېږي.
د پلاوي د معلوماتو له مخې، د عمومي او فرعي زابرانو پاکولو، د ځمکو اوارولو او وچو ځمکو تر اوبو لاندې کولو په موخه د هلمند په اووه ولسوالیو کې سروې شوې، چې له مخې یې مستحقي سیمې په نښه شوي او ځینې پروژې منظورې شوي دي.
د هلمند ولایت کرنې رئیس، الحاج مولوي نیازمحمد وهاج، د راغلي پلاوي هرکلی وکړ او ډاډ یې ورکړ، چې په ټولو کاري ساحو کې به بشپړه همکاري او سهولتونه برابر کړي. هغه ټینګار وکړ، چې ټولې پراختیایي پروژې به د نقشې او مشخصاتو مطابق په ټاکلي وخت تطبیق شي.
د یادونې وړه ده، چې څو مياشتې وړاندې د هلمند کرنې رئیس پلازمېنې ته د خپل سفر پر مهال د کرنې وزارت له مسؤلینو غوښتي وو، چې دې ولایت ته زیاته پاملرنه وکړي. هغه د کرنې سکتور د ودې لپاره د پراختیایي پروژو منظورولو غوښتنه کړې وه، چې مسؤلینو ورته د همکارۍ ډاډ ورکړی و.
