د کرنې وزارت سرپرست په مالي او اداري معینیت کې: د بودیجې اغېزناک لګول باید وزارت خپلې موخې ته ورسوي
۲ تله ۱۳۹۹
دکرنې، اوبولګولو او مالدارۍ وزارت سرپرست او نوماند وزیر ډاکټر انوارالحق احدي؛ مالي او اداري معینیت ته په تګ سره ددې معینیت د تشکیل، فعالیتونو، کاري سیمو او راتلونکو برنامو په هکله معلومات تر لاسه کړه.
په پیل کې د کرنې، اوبولګولو او مالدارۍ وزارت مالي او اداري مرستیال عبدالهادي رفیعي په لنډه توګه د پراختیا یي پروژو د پېژندنې او د دغو پروژو د فعالیت سیمې او بودیجې او دغه راز د بشري سرچینو، مالي، تدارکاتو، اداري، معلوماتي ټکنولوژۍ او د خوړو خوندیتوب او غلو دانو د اسټراټژیکو زېرمو د ریاستونو د لاسته راوړنو او ننګونو په هکله بشپړ مالومات وړاندې کړه.
تر هغه وروسته، د کرنې وزارت سرپرست او نوماند وزیر ډاکټر انوارالحق احدي، د پروژو د بودیجې د لګولو، د راتلونکي کال مالي پلان او د هغو شته ننګونو په هکله چې د مالي او اداري معینیت له خوا په څو برخو کې وویل شول، د خپل لارښوونیزو نظریاتو په وړاندې کولوسره وویل، راتلونکی کال بودیجوي امکاناتو ته په کتو د ننګونو هوارولو او د فرصتونو ایجادولو په موخه اړین ګامونه پورته کيږي.
ښاغلی احدي وویل، چې د ټولو پروژو او اړوندو برخو له خوا د بودیجې اغېزناک لګول باید داسې تر سره شي، چې وزارت خپل ټاکلي موخې ته ورسیږي.
