د کرنیزې پرمختیا وجهي صندوق د رهبرۍ شورا څوارلسمه غونډه ترسره شوه
د کرنیزې پرمختیا وجهي صندوق د رهبرۍ شورا څوارلسمه غونډه د کرنې، اوبو لګولو او مالدارۍ وزیر مولوي عطاءالله عمري په مشرۍ د کرنې وزارت کې ترسره شوه.
په دې غونډه کې د کرنې او مالدارۍ مرستیال مولوي صدراعظم عثماني، د مالیې وزارت مالي او اداري مرستیال مولوي عبدالقدیر احمد، د کرنې وزارت د اطلاعاتو او عامه پوهاوي رییس مولوي شیرمحمد حاتمي، د دفتر رییس مولوي محمد حسین خورشید احمد، د کرنیزې او مالدارۍ پرمختیا وجهي صندوق رییس انجنیر عبدالغفور غفاري، د افغانستان د صنعت او پانګونې خونې استازي او یو شمېر مالي او اقتصادي متخصصینو ګډون کړی و.
د کرنیزې او مالدارۍ پرمختیا وجهي صندوق مسؤلینو په دې غونډه کې د تېرو درېیو میاشتو د فعالیتونو راپور وړاندې کړ او د کرنې او مالدارۍ په برخه کې د فعالو شرکتونو لپاره د اسلامي مالي تمویلاتو د ورکړې، د فعالیتونو د پراختیا ستراتیژۍ جوړولو، ترسره شویو پرمختګونو او د صندوق د عوایدو د زیاتوالي په اړه معلومات وړاندې کړل.
مولوي عطاءالله عمري د راپورونو تر اورېدو وروسته، د اسلامي تمویلاتو د بهیر پر ښه والي، له شرکتونو سره د پانګونې د مشارکتونو پر پراختیا او د دې صندوق د پانګې پر پیاوړتیا ټینګار وکړ او اړینې لارښوونې یې وکړې.
همدارنګه، په غونډه کې ګډونوالو مالي او اقتصادي متخصصینو او سلاکارانو د صندوق د پانګې د ساتنې او مالي ثبات د پیاوړتیا په اړه خپل نظریات شریک کړل.
د کرنیزې پرمختیا وجهي صندوق له هغو فعالو بنسټونو څخه دی، چې د مرابحې، وکالې او مضاربت له لارې اسلامي مالي خدمات وړاندې کوي. دغه صندوق د کرنې وزارت تر رهبرۍ لاندې فعالیت کوي او د کرنې او مالدارۍ په برخو کې پانګونه ترسره کوي.
