د پکتیا په احمداباد او سیدکرم کې ۶۵ کورني قوریې جوړیږي
۲۵ لېندۍ ۱۳۹۸
د پکتیا د کرنې، اوبولګولو او مالدارۍ ریاست د ټولنې په کچه د ځمکې او ځنګلونو د تلپاتې مدیریت پروژې په همکارۍ ددې ولایت د احمد اباد او سیدکرم ولسوالیو د جلغوزې او چهارمغزو د ځنګلونو د بیارغونې په پار ۶۵ کورني قوریې جوړوي. د پکتیا د کرنې ریاست چارواکي وایي، چې د جلغوزې او چهارمغزو دیادوکورنیو قوریو د جوړولو په پار پر بزګرانو د قوریو جوړولو اړونده توکي وېشلي دي.
د پکتیا د کرنې ریاست وایي، چې ددې ولایت د احمد اباد په ولسوالۍ کې ۳۵ او د سید کرم په ولسوالۍ کې ۳۰ کورني قوریو جوړولو په پار پر بزګرانو د کورنیو قوریو د جوړولو اړونده توکي وېشل شوي دي.
د چارواکو په خبره په وېشل شويو توکو کې هر قوریه لرونکي ته ۱۴ بېلابېل توکي، چې په کې د جلغوزیو او چهارمغزو تخمونه، بېلچې او لاستې، د خېشاوې لپاره رمبې، پلاستیکي اوبه شیندونکی، د درملو شیندلو ماشین، توره او سپینه سره، د ناروغیو او افتونو د کنټرول درمل، پلاستیکي رسۍ، د جلغوزیو د کرلو لپاره پلاستیکي کڅوړې، د تونلونو لپاره پلاستیک او تونلونه ورکړل شوي دي.
باید وویل شي، چې له دې پروژې څخه برخمن شوي ټول قوریه لرونکو ته د جلغوزې او چهارمغزو د کرکېلي روزنه هم ورکړل شوي دي.