د ننګرهار وادي کرنیز شرکت کې د سپینخوړ د رسوباتو پاکول پیل شوه
۲۳ کب ۱۴۰۳ه.ش
۱۳ رَمَضانُ المُبارَک ۱۴۴۶ه.ق
د ننګرهار وادي کرنیز امارتي شرکت د درېیم فارم په ۶ام بلاک ساحه کې د سپینخوړ د رسوباتو پاکولو لړۍ پیل شوه. د دې پروسې د ارزونې لپاره د شرکت اجراییوي رئیس سیدمحمد نعیم محمدي، د درېیم فارم سرپرست امر انجنیر عتیقالله، د میکانیزې لوی مدیریت تخنیکي مدیر عبدالله نعمت او ځینو نور مسؤلین سیمې ته لاړل.
مسؤلین وايي چې د دې لړۍ موخه د سپینخوړ د اوبو بهیر تنظیمول، محافظوي پولې پیاوړې کول او کرنیزې ځمکې د اوبو د زیاتوالي له ګواښ څخه ژغورل دي.
د معلوماتو له مخې، په ۱۵ ورځو کې به شاوخوا ۱.۵ کیلومتره رسوبات پاک شي، چې له دې سره به د اوبو جریان ښه شي. همدارنګه، د شرکت اړوند ۴ام، ۵ام او ۶ام بلاکونو ۱زر او ۲۰۰ جریبه کرنیزه ځمکه او د سیمې د خلکو شاوخوا زر جریبه ځمکه به د اوبو د زیانونو له ګواښه خوندي شي. .
دا ټول کارونه د ننګرهار وادي کرنیز امارتي شرکت د خپلو ماشینریو، وسایلو، انجنیرانو او کارکوونکو په وسیله، په نږدې ۱.۵ میلیونه افغانیو ترسره کېږي.
