د ننګرهار وادي کرنیز امارتي شرکت د درېیم فارم د ځمکې زابرونه له رسوبي موادو پاکېږي

  ۱ غویی ۱۴۰۴ ه‍.ش
۲۳ شَوّالُ المُکَرَّم ۱۴۴۶ه‍.ق
د ننګرهار وادي کرنیز امارتي شرکت د درېیم فارم اړوند د دویم بلاک ۹۰مې نمرې کرنیزه ځمکه کې د زابرونو د پاکولو چارې پیل شوي، چې موخه یې د خاورې اصلاح، د اوبو د سطحې ټيټوالی او د کرنیزو چارو پیاوړتیا ښودل شوې ده.
د درېیم فارم امر مولوي محمد ګل مطمئن وايي، یاد زابرونه چې د فارم د جوړېدو پر مهال د ځمکې لاندې اوبو د تنظیم او د خاورې د ښه والي لپاره کیندل شوي وو، د تېرو څو لسیزو په ترڅ کې د نه پاکوالي له امله له رسوبي موادو ډک شوي دي. هغه زیاتوي، «پخوا به دغه زابرونه هر کال د درنې ماشینرۍ په وسیله پاکېدل، خو د وروستیو انقلابي او ناسازګارو حالاتو له کبله دا لړۍ درېدلې وه، چې له امله یې د اوبو سطحه لوړه شوې او د مالټې باغونو پر وده او حاصل منفي اغېز کړی دی.»
ښاغلي مطمئن د معلوماتو له مخې، دا ځل دا زابرونه د ابراهیم اکبرزي په نوم یوه خصوصي کرنیز شرکت د مالي لګښت او تجهیزاتو په مرسته پاکېږي، چې د ده په وینا، کارونه به په لنډو ورځو کې بشپړ شي.
نوموړی دا اقدام د مالټې بڼونو د سالمې ودې او د کرنیز حاصلاتو د لوړوالي لپاره ارزښتناک ګڼي او زیاتوي چې دغه چارې به د ځمکې ذهکشي ته لاره هواره کړي او د خاورې ساه اخیستنې ته زمینه برابره کړي.
د درېیم فارم امریت له ټولو قراردادي خصوصي کرنیزو شرکتونو غوښتنه کړې، چې د خپلو اړوندو بڼونو زابرونه پاک کړي، ترڅو د اوبو طبیعي جریان بېرته راژوندی شي، خاورې ته تازه‌والی ورکړل شي او د کرنیزو تولیداتو کچه لوړه شي.