د لغمان د کرنې رییس په مشرۍ د ځنګلونو ساتنې او بیا رغونې کمېټې دمرکز اړوند ګلارام او کرنج غرنیزو سیمو مشرانو سره ناسته وکړه
۱۷ لړم ۱۴۰۳ه.ش
۵ جُمَادَى الأول ۱۴۴۶ه.ق
د لغمان د کرنې، اوبولګولو او مالدارۍ په ریاست کې د ځنګلونو دساتنې او بیارغونې کمیټې مسؤلینو د کرنې رییس مولوي عبدالستار محمد په مشرۍ د مرکز اړوند ګلارام او کرنج سیمو مشرانو سره ناسته وکړه.
په دغه ناسته کې د لغمان امنیه قوماندانۍ، د ولایت مقام، د علماؤ شورا، قول اردو او لېوا او د استخباراتو استازو ګډون درلود.
په پیل کې د کرنې رییس مولوي عبدالستار محمد یادو سیمو مشرانو ته د ښه راغلاست ویلو ترڅنګ زیاته کړه، چې د اسلامي امارت د پرېکړې له مخې، د ولایت په کچه د ځنګلونو ساتنې او احیاء لپاره دغه کمېټه جوړه شوې، چې هرې ولسوالۍ ته به سفر کوي او له ځنګلیزو سیمو نږدې وګړو او قومي مشرانو سره د همغږۍ ناستې ترسره کوي او په دې برخه کې د دوی نظرونه اوري. ددې ترڅنګ نوموړي د ځنګلونو تولیدي او محافظوي ګټې ولسونو ته بیان کړې او له هغوی یې د دې ملي شتمنۍ د ساتنې په برخه کې د پاملرنې غوښتنه وکړه.
ورپسې، د علماؤ شورا استازي مولوي محمد هاشم هم خبرې وکړې، چې پکې یې د ځنګلونو ګټې ولسونو ته تشریح کړې او له ولسونو یې په دې برخه کې د همکارۍ غوښتنه وکړه.
د سیمو ولسونو دیادې کمیټې له دې هڅو څخه مننه وکړه، چې د ملي شتمني دساتلو او بیارغولو برخه کې هڅې کوي، دولسونوستونزې او نظرونه اوري او د ځنګلونو په ساتنه کې یې د همکارۍ ډاډ ورکړ.
هغوی ژمنه وکړه، چې د تېر په څېر به د ځنګلونو ساتنه کوي او چاته به اجازه نه ورکوي، چې طبیعي ځنګلونه پرې کړي. دغه راز، راغلو ولسونو یو شمېر غوښتنې هم له دوی سره شریکې کړې، چې د ستونزو او غوښتنو د حل په برخه کې د پلاوي له خوا ورته ډاډ ورکړل شو.
