د لغمان د کرنې رییس په مشرۍ د ځنګلونو ساتنې او بیارغونې کمېټې قرغهيي ولسوالۍ ته سفر وکړ
۱۳ لړم ۱۴۰۳ه.ش
۱جُمَادَى الأول ۱۴۴۶ه.ق
د لغمان د کرنې، اوبولګولو او مالدارۍ رییس مولوي عبدالستار محمد د ولایت او امنیتي مقاماتو په ملتیا د قرغهيي ولسوالۍ لرې پرتو غرنیو سیمو ته سفر وکړ او له قومونو سره یې د ځنګلونو ساتنې او بیارغونې په اړه غونډه وکړه.
د لغمان د کرنې، اوبولګولو او مالدارۍ رییس مولوي عبدالستار محمد د ځنګلونو د ساتنې او بیارغونې چارو کمېټې له غړو سره یوځای قرغهيي ولسوالۍ ته سفر وکړ. دې سفر کې د لغمان امنیه قوماندانۍ امنیتي مرستیال قاري عبدالباسط صدیق الرحمن، د ولایت مقام استازي، د علماؤ شورا غړي، د قول اردو استازي او د استخباراتو استازیو هم ګډون درلود. راغلي پلاوي په قرغهيي ولسوالۍ کې لومړی د ولسوالۍ له امنیه قومندان سره ناسته ترسره کړه او وروسته یې د لرې پرتو سیمو په غرنیو درو تورغر، کشموڼ او امبيړ کې له قومي مشرانو او ولسونو سره د ځنګلونو د ساتنې په اړه مشورتي ناسته وکړه.
په دې ناسته کې د ولسوالۍ د کرنيزو خدمتونو مدیر راغلي پلاوي ته د ښه راغلاست ترڅنګ د سیمو خلکو ته د ځنګلونو ساتنې په اړه مهم پیغامونه ورکړل. بیا د علماوو شورا غړي مولوي محمد هاشم د ځنګلونو د ارزښت او ګټو په اړه خبرې وکړې او له ولسونو یې د همکارۍ غوښتنه وکړه.
د کرنې رئیس مولوي عبدالستار محمد د اسلامي امارت د پرېکړې په اساس د ځنګلونو ساتنې او بیارغونې کمېټې په موخو خبرې وکړې او زیاته یې کړه، چې دا کمېټه به په ولایت کې د ځنګلونو ساتنې لپاره د ولسونو او قومي مشرانو سره په همغږۍ کار کوي. نوموړي د ځنګلونو اقتصادي، تولیدي او محافظوي ګټې هم روښانه کړې او له ولسونو یې وغوښتل چې د دې ملي شتمنۍ په ساتنه کې ځانګړې پاملرنه وکړي.
د غونډې په پای کې د یادو سیمو ولسونو د راغلي پلاوي څخه مننه وکړه، چې له نږدې یې د دوی ستونزې واورېدې او د ملي شتمنیو د ساتنې په برخه کې یې د هغوی نظريات واخیستل. د سیمو خلکو ډاډ ورکړ، چې د ځنګلونو ساتنه به کوي او هیڅوک به نه پرېږدي چې په غیرقانوني ډول ځنګلونه پرې کړي. دې ولسونو هم خپلې ستونزې او غوښتنې له پلاوي سره شریکې کړې چې د پلاوي مشرتابه یې د حل ډاډ ورکړ.
