د روزګان د اوبو مدیریت لپاره مهم ګام؛ د څلورو چکډېمو جوړولو لپاره سروی ترسره شوه
د کرنې، اوبولګولو او مالدارۍ وزارت یو باصلاحیته پلاوی، چې مشري یې د یاد وزارت د اوبولګولو او قدرتي سرچینو مرستیال مولوی باز محمد فیضان کوله د روزګان ولایت ته سفر وکړ، څو د څلورو چکډېمو د جوړولو لپاره تخنیکي سروی ترسره کړي.
یاد پلاوي د خپل سفر په ترڅ کې د روزګان ولایت د کرنې، اوبولګولو او مالدارۍ ریاست له رییس، الحاج مولوي عطاءالله راشد سره ناسته وکړه. په دغه ناسته کې دکرنې وزارت د اوبولګولو او قدرتي سرچینو مرستیال مولوی باز محمد فیضان د سيلابي اوبو د مهار اهمیت، ګټو او د چکډېمو د اغېزمنتیا په اړه تفصیلي معلومات وړاندې کړل.
ښاغلی فیضان وویل: د کرنې وزارت موخه دا دی چې په ټول هېواد کې د سیلابي اوبو د مهار لپاره اغېزمن ګامونه واخلي، څو هم اوبه خوندي شي او هم د ځمکې لاندې اوبو سطحه باثباته وساتل شي.
په همدې حال کې د روزګان د کرنې رییس ډاډ څرګند کړ چې د سروې او پروژې د پلي کېدو په برخه کې به لازم ګامونه پورته کوي.
د سروی له مخې، درې چکډېمونه به د روزګان د مرکز ترینکوټ اړوندو سیمو کې، او یو چکډېم به په دهراوود ولسوالی کې جوړ شي. د دغو چکډېمو په جوړېدو سره به سیلابي اوبه مهار شي، او د ځمکې لاندې اوبو سطحه به لوړه شي، چې دا کار به د کرنې پراختیا ته زمینه برابره کړي.
