د روان کال په لومړی نیمایي کې، څه باندې ۹ټنه زېره راټول شوي

۹مرغومې ۱۳۹۹
د کرنې، اوبولګولو او مالدارۍ وزارت د احصایې او مالوماتو ریاست شمېرې ښیي، چې د روان لمریز کال په لومړی نیمایي، کې د هېواد په کچه ۹ مټریک ټنه زېره راټول شوي دي.
یاد ریاست دغه راز وایي، چې تېرکال په ټولیزه توګه ۱۲.۹۸۹ مټریک ټنه زېره راټول شوې وه. د دې شمېرې پر اساس، د تېرکال په پرتله د زېرې سږني کچه به د پام وړ زیات شي.
دغه راز د کرنې وزارت د احصایې ریاست شمېرې ښیي، چې د روان کال په لومړیو شپږو میاشتو کې له هېواده بهر ددې بوټي د صادراتو کچه د تېرکال د ورته دورې په پرتله، زیات شوي دي او ددغو صادراتو ارزښت شپږ میلیونه او ۲۱۶ زره ډالرو ته رسیږي. تېرکال د زېرې د صادراتو ټولیز ارزښت شپږ میلیونه او ۴۳۱ زره ډالرو ته رسېدلې وه. دغو شمېرو ته په کتو د روان کال تر پایه د زېرې د صادراتو کچه هم د پام وړ زیاتیږي.
په افغانستان کې بدخشان، جوزجان، ارزګان، دایکندي، نیمروز، زابل، هلمند، کندهار، بلخ، سمنګان، فراه، بادغیس او پکتیکا د زېرې لوی تولیدوونکي ولایتونه دي.
د زېرې بوټې ۱۵ تر۵۰ سانتي مترو پورې لوړوالي، نرۍ او اوږدې رېښې لري. زېره بېلابېل ډولونه لري، چې تر ټولو نوموتي هغو یې توره زېره، سپینه زېره او شنه زېره ده. له زیرې څخه په خوړو او طبابت کې ګټه اخیستل کیږي او په کور د ننه او بهر ښه مارکېټ هم لري.