د خوړو نړيوال پروګرام"WFP"دکرنې وزارت په همغږۍ ۲۵۰ بېوزله کورنيو سره مرسته کوي

۱۰/صفر/۱۴۴۳هـ.ق
۲۶/وږی/۱۴۰۰هـ.ش 
د افغانستان ا.ا  د کرنې، اوبولګولو او مالدارۍ وزارت سرپرست الحاج مولوی عبدالرحمن راشد نن د خوړو نړيوال پروګرام "WFP" له يوشمېر استازو سره وليدل.
په دې ليدنه کې د "WFP" مؤسسې استازو خپل راتلونکې پروګرامونه د افغانستان ا.ا  د کرنې، اوبولګولو او مالدارۍ وزارت سرپرست الحاج مولوي عبدالرحمن راشد سره شريک کړل. دوی په دې ناسته کې ژمنه وکړه،  چې د پروان او کاپيسا ولايتونو په يوشمېر ولسواليو کې به پر ۲۵۰ بېوزله کورنيو چې بزګران او اړمنې کورنۍ به په کې شامل وي اصلاح شوي تخمونه د شېدو اوزې او د هګيو چرګ ووېشي.
ياد استازي د لاډېرو مرستو د ژمنې ترڅنګ د کرنې، اوبولګولو او مالدارۍ وزارت مشرتابه څخه په دې برخه کې د همکاریو غوښتنه وکړه.
په همدې حال کې د افغانستان ا.ا د کرنې، اوبولګولو او مالدارۍ وزارت سرپرست په دې ليدنه کې  د خوړو نړيوال پروګرام "WFP"  له استازو څخه دمننې ترڅنګ،  دوی ته په ټولو برخو کې د پوره همکاريو ډاډ ورکړ او زیاته یې کړه،  چې موږ دWFP په ګډون ټولو خیریه مؤسسوته د کارکولو د هر راز اسانتیاوو برابرولو ترڅنګ هغوی ته د پوره امنیت ډاډ ورکوو.
دکرنې وزارت چارسمبال وويل،  چې یادې مرستې باید په شفاف ډول پر مستحقو کورنیو ووېشل شي.