د اړمنو کورنیو د ملاتړ په دوام لوګر کې پر ۲۰۰ کورنیو څاروي ووېشل شول
۲۸ کب ۱۴۰۱ه.ش
۲۶ شَعبان المُعَظّم ۱۴۴۴ ه.ق
د لوګر دکرنې، اوبولګولو او مالدارۍ ریاست د بشري ځواک د پراختیا ادارې په مالي مرسته ددې ولایت د محمدآغې په ولسوالی کې پر ۲۰۰ بې وزله کورنیو څاروي وېشلي دي.
د چارواکو په خبره ددې مرستې په لړ کې هرې کورنۍ ته دوه مېږي ورکړل شوي دي.
ددې مرستې موخه د بېوزله او اړمنو کورنیو لاس نیوي او په ټوله کې په دې سیمه کې د مالدارۍ سکټور ته پراختیا ورکول دي.
باید وویل شي، چې دکرنې، اوبولګولو او مالدارۍ وزارت دکرنې او مالدارۍ سکټور د پراختیا په پار هلې ځلې کړندي کړي دي، چې تر دې مخکې هم په یوشمېر ولایتونو کې پر اړمنو کورنیو څاروي او د څارویو خوراکي توکي وېشلي دي.
