خوندور او ښکلی رنګ: د کندهار انار په کابل کې جوس کیږي

mail-admin
شنبه ۱۳۹۹/۸/۳ - ۱۵:۵
خوندور او ښکلی رنګ: د کندهار انار په کابل کې جوس کیږي


د امید بهار شرکت د هغو ګوټې په شمار کورني شرکتونو څخه دی، چې په ډېره پانګونې سره وطني محصولات پروسسوي. دغه شرکت د فعالیت ۱۱ کلن مخینه لري او بېلابېل لبني توکي او د بڼوالۍ محصولات پروسسوي او کورنیو او بهرنیو بازارونو ته یې وړاندې کوي.
د یاد شرکت چارواکي وایي، چې د دوی تولیدات ښه خوند او لوړ کیفیت لرونکي دي. په همدې موخه د امیدبهار د محصولاتو پېرېدونکي کورني او بهرني وګړي دي.
په دې هکله د دې شرکت مسوول عبدالرحمان جمعه‌زی د بزګر اوونیزې ته وویل: «زموږ شرکت په ټول کال کې کار کوي، بېلابېل وطني مېوې پروسسوو او جوس ترې جوړوو، په همدې توګه لبني توکي هم پروسسوو، اوس د انارو موسم دی، د کندهار انار پروسسوو او جوس ترې جوړوو.»
د عبدالرحمان په خبره افغاني او بهرني وګړي د دوی تولیداتو ته لېوال دي: «په دې فصل کې د ورځې ۱۲۰ ټنه د کندهار انار پروسسوو، د کندهار انار ښه خوند او لوړ کیفیت لري، په همدې موخه ددې ولایت انار پېرو او جوس ترې جوړوو، د انارو له هر ۱۰ کیلو مېوې څخه د انارو یوه کېلو اوبه په لاس راځي، زموږ د ماشینونو وړتیا په یوه شپه او ورځ کې ۳۶۰ مټریک ټنو ته رسیږي، که خدای کول راتلونکی کال د شرکت فعالیت پراخوو.»
هغه زیاته کړه: «زموږ جوس د  پاکستان، امارات او قرغیزستان هېوادنو ته صادریږي، او هلې ځلې کوو چې د سیمې په هېوادونو کې د خپل خرڅلاو کچه زیاته کړو. په دې برخه کې زموږ ۱۷۰ هېوادوال په دندو بوخت دي، دهغه په خبره، د انارو د جوس هر کارتن چې ۱۲ لوی یو لیټره بوټلې په کې دي په ۷۰۰ افغانۍ خرڅوي، چې د کیفیت له پلوه له بهرنیو جوسونو څخه یې کیفیت لوړ او بیه یې هم ټیټ ده.»
هغه وایي، چې په دې برخه کې له خپلې پانګونې ډېر خوښ دی. د هغه په اند که د بهرني تولیداتو د قاچاقي وارداتو مخه ونیول شي، کورني تولیدي شرکتونه ډېر ژر وده کوي.
ددې شرکت تولیدات د «کوثر قیماق(قیماق کوثر)، نوبهار جوس(جوس نوبهار)، تازه شېدې (شیرتازه)، ملي جوس(جوس ملي) او قوت شېدې(شیرقوت)» په نومونو بازار ته وړاندې کیږي.
د امیدبهار د شرکت یو کارکوونکی توریالی مومند وایي: «۱۱کاله کیږي، چې دلته کار کوم، لومړی مېوه په بڼ کې معاینه کوو او ګورو چې کیفیت یې څنګه دی، که کیفیت یې ښه وي بیا مېوه شرکت ته لېږدو، پروسسوو، خوند، کیفیت او روغتیا یې بررسي کوو.»
مېوه شرکت ته تر لېږد وروسته په معیاري ډول مینځل کیږي، پروسس او بسته بندي کیږي او بازار ته وړاندې کیږي.
ښاغلی مومند وایي: «د افغانستان مېوې نړیوال معیار لري، په همدې موخه زموږ محصولات هم نړیوال معیارونه لري، په ځانګړې توګه انار، چې ځانګړې کیفیت او خوند لري.»
ددې شرکت بل کارکوونکی عبدالقیوم رامين وایي: «اووه کاله کیږي، چې د امیدبهار شرکت د کیفیت په برخه کې کار کوم، دلته تر ټولو مجهز لابراټوار لرو، چې د سیمې په کچه هیڅ یوه شرکت هم داسې لابراټوار نه لري، محصولات دلته لېږدو او په لابراټوار کې له اووه ورځې ساتنې وروسته بیا پرېکړه کوو چې مېوه وپېرو که یې رد کړو، که مېوه په معیار برابر او مناسب و او تایید شو بیایې پېرو او پروسسوو.»
د کابل ښار یو هټۍ وال جماالدین وایي: «کله چې د کورني انارو د جوس تولید پیل شوې ده، خلک د وطن له تولید څخه ډېره ګټه پورته کوي.» هغه چې د کابل د تهیه مسکن په مارکېټ کې خپل هټۍ ته جوس پېري وايي: «د افغانستان هرمحصول ښه کیفیت لري، پنځه میاشتې کیږي، چې انار، شېدې او وطني قیماق پېرم او پر خپلو مشتریانو خرڅوم، د وطن محصول هم ښه کیفیت لري او هم یې بیه ټیټه ده، اوس مهال یو بوتل بهرني جوس څه باندې ۱۰۰ افغانۍ خرڅوو، او د وطن جوس په ۸۰ افغانۍ خرڅوو، په دې وروستیو کې د وطني تولیداتو مشتریان ډېر شوي دي.»
د افغانستان انار نړیوال شهرت لري. ددې مېوې کیفیت او خوند په نړۍ کې ساری نه لري. په همدې موخه د امیدبهار د شرکت چارواکي وایي، په پام کې لري، چې خپل فعالیتونه پراخ کړي، چې په نږدې راتلونکې کې به هېواد په دې برخه کې د پام وړ پرمختګ وکړي.

تازه ترین اخبار

چهارشنبه ۱۳۹۹/۹/۵ - ۱۴:۴۴
Background image

لغمان کې د لیمو بڼونه او حاصلات ډېر شوي

۵ لیندۍ ۱۳۹۹
د لغمان ولایت د کرنې، اوبولګولو او مالدارۍ ریاست وایي چې، په دې وروستیو کلونو کې په دې ولایت کې د لیمو بڼونه او حاصلات ډېر شوې او مخ پر وده روانه ده.
د لغمان د کرنې رییس. . .

چهارشنبه ۱۳۹۹/۹/۵ - ۱۴:۳۷
Background image

د بڼوالۍ ځنځیري ارزښت د پراختیا پروژې له خوا په څلورو ولایتونو کې د ۱۸۶ ممیزخونو جوړول

۵ لیندۍ ۱۳۹۹
د کرنې، اوبولګولو او مالدارۍ وزارت اړوند د بڼوالۍ ځنځیري ارزښت د پراختیا پروژه «HVCDSP» د کرنیزو محصولاتو مدیریت د پروژې په اډانه کې د کابل، پکتیکا، لوګر او غزني په. . .

چهارشنبه ۱۳۹۹/۹/۵ - ۱۴:۸
Background image

ارزګان کې پر لس زره او ۶۶۰ بزګرانو د غنمو اصلاح شوي تخمونه وېشل کیږي

۵ لیندۍ ۱۳۹۹
د ارزګان دکرنې، اوبولګولو او مالدارۍ ریاست ددې ولایت پر بزګرانو د غنمو د اصلاح شویو تخمونو د وېش لړۍ پیل کړی دی.
په دې لړۍ، کې د ارزګان ولایت په کچه پر لس زره او ۶۶۰. . .

بازگشت