ترکیې د غنمو سل مټریک ټنه اصلاح شوې تخم د کرنې وزارت ته وسپاره

۳ ربیع‌الثاني ۱۴۴۳ه.ق
۱۸ لړم ۱۴۰۰ ه.ش
د ترکیې هېواد د بشر دوستانه مرستو بنسټ (IHH) د کرنې، اوبولګولو او مالدارۍ وزارت سره د غنمو سل مټریک ټنه اصلاح شوې تخمونو مرسته وکړه، چې نن د یوې غونډې په ترڅ کې د کرنې وزارت مشرتابه ته وسپارل شوه.
په هغه غونډه کې، چې د کابل د بادام باغ په څېړنیز فارم کې د یادو غنمو د اخیستنې په پار جوړه شوې وه د کرنې، اوبولګولو او مالدارۍ وزارت سرپرست وزیر مولوی عبدالرحمان راشد، د ترکیې د بشردوستانه مرستو د بنسټ استازو، په افغانستان کې د ترکیې د سفارت مرستیال، د کرنې وزارت مرستیالان او یوشمېر خبریالان حضور درلود.
د کرنې، اوبولګولو او مالدارۍ سرپرست وزیر مولوی عبدالرحمان راشد په دې غونډه کې د ترکیې هېواد له مرستو څخه د قدردانۍ ترڅنګ وویل، چې د افغانستان بزګران د نړۍ د خلکو لا ډېرو مرستو او همکاریو ته اړتیا لري. هغه وویل: «په دې سختو شرایطو کې، چې د ترکیې هېواد د افغانستان خلکو سره مرسته کوي ترې مننه کوم. اوس په افغانستان کې امنیت تامین شوې ده او د نړۍ له هېوادونو او سازمانونو غواړو چې د افغانستان له بزګرانو سره لاډېرې مرستې او همکارۍ وکړي ترڅو د خلکو د ستونزو کچه ټیټه شي.»
ښاغلی راشد دې ته په اشارې سره، چې اسلامي امارت له فساده پاک حکومت جوړه کړې ده، په سمه توګه د مرستو د وېش په پار مرستندویو هېوادونو ته ډاډ ورکړ او ویې ویل: «د افغانستان نږدې ۷۰ سلنه خلک کروندګر دي او هر هېواد او یا مرستندویه بنسټ، چې د افغانستان بزګرانو سره مرسته وکړي، ډاډ ورکوو چې مرستې یې نه حیف‌و‌میل کېږي او پر سمه او نظمه توګه پر اړمنو خلکو وېشل کېږي.»
دغه راز په دې غونډه کې، د ترکیې د بشردوستانه مرستو د بنسټ مسوول حسین اروج د اصلاح شوې تخمونو ارزښت ته په اشارې سره ددې بنسټ د مرستو د دوام ډاډ ورکړ او ویې ویل: «ډېر کلونه کېږي، چې په افغانستان کې فعالیت لرو، په جګړه ځپلو سیمو کې مو له خلکو سره مرستې کړي دي او په راتلونکې کې دا لړۍ ته ادامه ورکوو. کرنیز اصلاح شوې تخمونه لوړ ارزښت لري، چې د حاصلاتو کچه لوړوي او برکت راولي. په راتلونکې هم خپلو مرستو دوام ته ژمن یو.»
په کابل کې د ترکیې سفارت مرستیال سمیع ترکود، هم افغانستان ته د خپل هېواد د مرستو د ژمنتیا ډاډ ورکړ او د اسلامي امارت له چارواکو څخه و غوښتل، چې مرستې اړمنو کسانو ته ورسوي.
په همدې حال کې په یاده غونډه کې د کرنې، اوبولګولو او مالدارۍ وزارت د کرنې او مالدارۍ مرستیال مولوی صدراعظم او مالي او اداري مرستیال فضل‌باري‌ فضلي هم د ترکیې له مرستو څخه د مننې ترڅنګ افغانستان سره د نړیوالې ټولنې د لاډېرو همکاریو غوښتونکي شول.