اروزګان کې د کرنیزو محصولاتو مدیریت پروژې چارې ۷۰ سلنه بشپړ شوي
۲۴ تله ۱۳۹۹
د کرنې وزارت د کرنیزو محصولاتو مدیریت د پروژې په اډانه کې د اروزګان په ولایت کې د کروندګرو او بڼوالو د حاصلاتو د ساتنې او خوندیتوب په پار د ۷۲ پروژو د پلي کېدو چارې پیل کړي دي، چې رغنیزې چاري یې ۷۰ سلنه بشپړ شوي دي او پاتې چارې به یې هم ډېر ژر بشپړ او ګټې اخیستنې ته به وسپارل شي.
په دغو پروژو کې د پیازو ۵۰ او د کچالو پنځه صفرانرژۍ زېرمتونونه او د انارو دوه صفر انرژۍ سړې خونې جوړول او پر کروندګرو د سبو او مېوو ۱۵ لمریز وچوونکي دستګاوې وېشل شامل دي، چې د بزګرانو په لس سلنې او د کرنې وزارت په ۹۰ سلنې ونډې سره پلي کیږي.
د دغو پروژو ټولیز لګښت ۳۲ میلونه افغانۍ ده، چې رغنیزې چارې به یې په راتلونکي دوو اونیو کې بشپړې شي.
ددې برنامې له لارې ګڼو بې کارو خلکو ته د کار زمینه هم برابره شوي ده؛ دغه پروژې د اروزګان ولایت په مرکز او ولسوالیو کې کرنیزو حاصلاتو ته په کتو کروندګرو او بڼوالو ته جوړیږي، چې په جوړېدو سره یې د حاصلاتو د خوسا کېدو مخه نیول کیږي او د بزګرانو او بڼوالو د عوایدو د زیاتوالي لامل هم کیږي.
