ارزګان کې د ورځې ۱۸۰۰ لیټره شېدې تولیدېږي

۶ سلواغه ۱۳۹۹
ارزګان یو له هغو ولايتونو څخه دى، چې ډېرى خلک يې په کرنه او مالدارۍ بوخت دي، د بېلابېلو سبو، غلو دانو او مېوو د تولید ترڅنګ، په دې ولایت کې د مالدارۍ صنعت هم غوړېدلی، چې ورسره په دې ولایت کې د لبني محصولاتو د تولید کچه هم لوړه شوې ده.
د ارزګان د کرنې، اوبولګولو او مالدارۍ ریاست د معلوماتو له مخې په ارزګان کې د دودیزې مالدارۍ ترڅنګ د غوا روزنې پنځه فارمونه چې په کې تر ۹۰ غواوې روزل کېږي شتون لري، چې له دغو غواوو څخه ډېر شمېر یې شېدې ورکوونکي دي. د ارزګانولایت د غواساتنې په فارمونو کې یوشمېر کسانو ته په نېغه او نانېغه توګه د دندې زمینه هم برابره شوې ده.
د چارواکو په خبره له دغو فارمونو څخه د ورځې ۱۸۰۰لیټره شېدې تر لاسه کېږي.
د ارزګان د غوا روزنې فارمونه ته په داسې حال کې د ودې زمینه برابره شوې، چې د کرنې ریاست له خوا ددې ولایت مالدارانو ته په ګڼو برخو کې بېلابېل پراګرامونه پلي شوي، چې له هغې ډلې یې، د واکسینونو پلي کول، داوا پاشي، عامه پوهاوی او د اړوند وسایلو ورکړه هغه څه دي چې مالدارانو ته د ترسره شو دي.
ددې ترڅنګ د مالدارانو روزل، په مرکز او ولسوالیو کې د ناروغو څارویو سمپل اخېستل، د کنې او کانګو ضد کمپاینونه په لاره اچول هغه څه دې، چې په د روان کال په ترڅ کې د ارزګان د کرنې او مالدارۍ ریاست له خوا تر سره شوي دي.
افغانستان له اقتصادي پلوه تر ډېره بريده په کرنه او مالدارۍ ولاړ دى، په همدې موخه د کرنې، اوبولګولو او مالدارۍ وزارت هم په دې وروستیو کې د مالدارۍ او د لبنیاتو د پراختیا په پار هلې ځلې کړندي کړي دي. د لبنیاتو پروسس او د مالدارو کورنیو اقتصادي ودې ته د کرنې وزارت پاملرنه تر پخوا زیاته شوې ده.