د پکتیکا اورګون کې له ۲۰۰ مستحقو بزګرانو سره د کرنیزو توکو مرسته وشوه
۱۹ وږی ۱۴۰۵ هـ.ش
۲۷ رَبِیعُ الْأَوَّل ۱۴۴۸ هـ.ق
د پکتیکا ولایت د اورګون ولسوالی کې، د «اویک» مؤسسې له لوري، د «په لویدیځ، سویلي او سوېل ختیځ افغانستان کې د اقلیمي انعطاف او اقتصادي ثبات لپاره د زیانمنو ټولنو پیاوړتیا» پروژې په چوکاټ کې، د پکتیکا ولایت د کرنې، اوبو لګولو او مالدارۍ ریاست تر چتر او همغږۍ لاندې، ۲۰۰ مستحقو بزګرانو ته کرنیز توکي په شفاف او منظم ډول ووېشل شول.
د یادو مرستو په لړ کې هر مستحق بزګر ته۵۰ کیلوګرامه د غنمو اصلاح شوی تخم، ۵۰ کیلوګرامه توره سرهاو ۵۰ کیلوګرامه سپینه سره ورکړل شوې ده.
د مرستو د وېش بهیر د اړوندو مسؤلینو او استازو په حضور کې ترسره شو او د مستحقو بزګرانو د پېژندنې او توکو د وېش پر مهال د روڼتیا او ټاکل شویو معیارونو رعایت ته ځانګړې پاملرنه وشوه.
د یادې پروژې موخه د بزګرانو د کرنیزو تولیداتو د زیاتوالي، د اقلیمي بدلونونو پر وړاندې د هغوی د مقاومت د پیاوړتیا او د زیانمنو کورنیو د اقتصادي وضعیت د ښه والي په برخه کې مرسته کول دي.
د پکتیکا د کرنې، اوبو لګولو او مالدارۍ ریاست د ورته پروژو د تطبیق او څارنې په برخه کې د همکارو مؤسسو د فعالیتونو هرکلی کوي او ټینګار کوي، چې کرنیزې مرستې باید په شفاف، عادلانه او د ټاکل شویو معیارونو مطابق مستحقو بزګرانو ته ورسېږي.
