د کرنې وزارت د پلان او برنامو د همغږۍ لوی رییس د افغانستان لپاره د هالینډ کمېټې د پروګرامونو له مسوول سره وکتل
۶ زمری ۱۴۰۵ هـ.ش
۱۳ صَفَر المُظَفَّر ۱۴۴۸ هـ.ق
د کرنې، اوبولګولو او مالدارۍ وزارت د پلان او برنامو د همغږۍ لوی رییس مولوي عبدالعلي عمري د افغانستان لپاره د هالینډ کمېټې د پروګرامونو له مسوول ډاکټر فریدون سره په کتنه کې، د کرنې وزارت د لومړیتوبونو، پالیسیو او سټراټېژۍ پر بنسټ د ګډو همکاریو پر دوام او د کرنیزو پروژو پر پلي کېدو ټینګار وکړ.
د همغږۍ او تخنیکي دا ناسته د دواړو لوریو د تخنیکي همکارانو په شتون کې ترسره شوه او پهکې دواړو خواوو د کرنې په برخه کې د همکاریو د پراختیا او د پرمختیایي پروګرامونو د پلي کولو په تړاو خبرې اترې وکړې.
مولوي عبدالعلي عمري د افغانستان لپاره د هالینډ کمېټې د همکاریو د ستاینې ترڅنګ، د کرنې سکتور د پراختیا په لاره کې د ګډو همکاریو پر دوام ټینګار وکړ او غوښتنه یې وکړه، چې د دې بنسټ ټول فعالیتونه او پروژې دې د کرنې، اوبولګولو او مالدارۍ وزارت د لومړیتوبونو، پالیسیو او سټراټېژۍ له مخې ډیزاین او پلي شي.
په ورته وخت کې، ډاکټر فریدون د هوکړه لیکونو د لاسلیک کولو په برخه کې د کرنې وزارت له همکارۍ مننه وکړه او ډاډ یې ورکړ چې دا اداره به په راتلونکي کې هم په افغانستان کې د کرنې په برخه کې نورې پروژې پلې کړي.
په پای کې، دواړو لوریو د هېواد د کرنې سکتور د تلپاتې پراختیا په لاره کې د همغږۍ پر پیاوړتیا، د تخنیکي همکاریو پر دوام او د اغېزناکو پروګرامونو پر پلي کېدو ټینګار وکړ.
