اروزګان کې د زعفرانو لس ننداریزې کروندې جوړېږي
۲۳ چنګاښ ۱۴۰۰
د اروزګان د کرنې، اوبولګولو او مالدارۍ ریاست چارواکي وایي، چې په دې ولایت کې د زعفرانو د کرکېلي د ترویچ په پار پر یوشمېر بزګرانو د زعفرانو تخم «پیاز»، کیمیاوي سرې، تقویتي درمل او اړین توکي وېشلي دي، چې له مخې یې ددې ولایت په مرکز ترینکوټ او یوشمېر ولسوالیو کې د زعفرانو لس ننداریزې کروندې جوړېږي.
د زعفرانو پیاز او کرنیزې بستې ددې ولایت د مرکز او یوشمېرولسوالیو پر مخکښو بزګرانو وېشل شوي دي.
د کرنې وزارت، په اروزګان کې د زعفرانو ۱۰ ننداریزې کروندې جوړوي، چې هره ننداریزه کرونده یې په نیم جریبه ځمکه کې جوړېږي او د هرې ننداریزې کروندې د جوړولو په پار ۵۰۰ کیلوګرامه د زعفرانو پیاز، کیمیاوي سره، تقویتي درمل او یو کرنیزه بسته وېشل شوې ده.
د اروزګان د کرنې ریاست وایي، چې د اروزګان ولایت دزعفرانو کرکېلي او تولید له پاره ښه مناسب اقلیم لري، او په دې ولایت کې د زعفرانو کرکېله د کمیت او کیفیت له پلوه ښه نتیجه ورکړې ده.
په دې وروستیو کلونو کې د اروزګان په ځینو سیمو کې د زعفرانو کرکېله ترویج شوې ده. د اروزګان د کرنې ریاست هیله لري چې، ډېر ژر په دې ولایت کې د زعفرانو کرکېله او تولید زیات شي.
د یادونې وړ ده، هغو مخکښو بزګرانو ته چې، ورته د زعفرانو ننداریزې کروندې جوړېږي، د کرنې وزارت د زعفرانو متخصصینو له لورې ورته د زعفرانو کرکېلي، حاصل ټولولو او پروسس په برخه کې عملي او نظري زده کړې هم ور کولکېږي.
