د لغمان کرني ریاست کي د ممپلیو د پروسس کارخونې د جوړولو په تړاو ناسته وشوه
۱۰ کب ۱۴۰۴ه.ش
۱۲ رَمَضانُ المُبارَک ۱۴۴۷ه.ق
د لغمان د کرنې، اوبولګولو او مالدارۍ رییس مولوی سلیمان ایمن، د یو خصوصي شرکت له استازې ډاکټرې ګلنار سره د ممپلیو د پروسس کارخونې لپاره د اجارې ځمکې د مشخص کولو په موخه ناسته ترسره کړه.
په دې ناسته کې د لغمان د کرنې ریاست تخنیکي سلاکار انجینر سردار زیار، د اجارې ورکونې لوی مدیر انجنیر سید عمران او د کدستر لوی مدیر انجنیر احمدالله هم ګډون درلود.
د شرکت مسؤلې وویل، غواړي چي د لغمان ولایت په قرغیو ولسوالی کې د ممپلیو د پروسس یوه کارخونه جوړه کړي او د دې لپاره 40 جریبه ځمکې ته اړتیا لري. نوموړې زیاته کړه، چې د یادې فابریکې له لارې به د ماشومانو د خوارځواکۍ د مخنیوي لپاره متوازن خواړه تولید شي او له سلو څخه زیاتو کسانو ته به د کار زمینه برابره شي.
د لغمان د کرنې رییس مولوی سلیمان ایمن د یادې کارخونې د جوړولو په برخه کې د بشپړې همکارۍ ډاډ ورکړ او ویې ویل، چې په ټول هېواد کې بشپړ امنیت تأمین دی او ټول کورني او بهرني پانګوال کولای شي په ډاډه زړه پانګونه وکړي. نوموړي زیاته کړه، چې په حاکم نظام کې د هر فرد سر او مال خوندي دی.
نوموړي د اجارې ورکولو او کدستر مدیریتونو مسؤلینو ته سپارښتنه وکړه، چې د شرکت لپاره یوه مناسبه ځمکه وټاکي او اړوند چارې ژر تر ژره تنظیم کړي.
د یادونې وړ ده، چې د لغمان د کرنې، اوبولګولو او مالدارۍ ریاست په ټولو پانګوالو غږ کوي، چې د کرنې او مالدارۍ په برخه کې له برابرې شوې پانګونې زمینې څخه ګټه واخلي.
