زابل کې د انځرو بڼونو د جوړولو پروګرام پیل شو؛ په شاجوی، میزان او کلات کې ۷۵ جریبه بڼونه جوړېږي
۵ سلواغه ۱۴۰۴ه.ش
۶ شَعبان المُعَظّم ۱۴۴۷ه.ق
د زابل ولایت د کرنې، اوبو لګولو او مالدارۍ ریاست د ملګرو ملتونو د پراختیایي ادارې « یوانډيپي» په همکارۍ ددې ولایت د مرکز کلات په ګډون په شاجوی او میزان ولسوالیو کې د انځرو د بڼونو د جوړولو پروګرام عملي کوي.
د دې پروګرام له مخې به۱۵۰ بزګرانو ته د نیم نیم جریب په کچه د انځرو بڼونه جوړ شي، چې ټولیزه اندازه یې ۷۵ جریبه ځمکه جوړوي. د یادو بڼونو د جوړولو په لړ کې د کرنې، اوبو لګولو او مالدارۍ ریاست او د یادې موسسې د مسلکي کارکوونکو له لوري د بڼونو د ځمکو نقشه کول، د څاڅکي اوبه خور سیستم نصبول، او د بڼونو د معیاري جوړولو چارې ترسره کېږي.
سربېره پر دې، یادو بزګرانو ته به د مسلکي کسانو له لوري د بڼوالۍ او کرنې اړوند تخنیکي او مسلکي روزنې هم ورکړل شي، تر څو وکولای شي خپل بڼونه په سمه او معیاري توګه وساتي او ښه حاصلات ترې ترلاسه کړي.
د یادونې وړ ده چې د زابل د کرنې، اوبو لګولو او مالدارۍ ریاست تر دې وړاندې هم ۱۵۰۰ کورنیو ته د غنمو اصلاح شوي تخمونه، کیمیاوي سپینه او توره سره وېشلې وه.
د زابل د کرنې ریاست چارواکي وایي، هڅه کوي چې د بېلابېلو بنسټونو په همکارۍ زابلي بزګرانو ته دا ډول ګټور او دوامدار پروګرامونه برابر کړي، تر څو بزګران وکولای شي په راتلونکي کې خپلې اقتصادي ستونزې په خپله حل او د خپلو کورنیو اقتصادي وضعیت ښه کړي.
