۹۹یم کال کې، نږدې دوه زره ټنه سویابین تولید شوي
۵ غویی ۱۴۰۰
د کرنې، اوبولګولو او مالدارۍ ریاست شمېرې ښيي، چې په ۱۳۹۹یم کال کې د هېواد په کچه یوزرو ۹۹۷ مټریک ټنه سویابین تولید شوي دي. کاپیسا د ۹۳۰ ټنو په تولید سره تر ټولو ډېر تولید درلود. په دې ولایت کې تېرکال په ۶۲۰ هکټاره ځمکه سویابین کرل شوې وه.
د سویابینو په تولید کې بلخ، هرات، ننګرهار، پروان، تخار، بغلان، کندز، لغمان او هلمند هم مهمه ونډه لري.
په ټولیزه توګه د هېواد په کچه په یوزرو ۶۲۴ هکټاره ځمکه سویابین کرل شوې وه.
سویابین بشپړه پروتیني او مغذي مواد لري او د کورنیو په روغتیا په ځانګړي ډول د ماشومانو د خوارځواکۍ په مخنیوی کې رغنده رول لري.
د سویابینو کرکېله په ۲۰۰۳ ام کال کې دود شوې ده، چې اوس په یو مهم کرنیز توکي بدل شوې او د هېواد په ډېرو ولایتونو کې کرل کېږي. د کرنې، اوبولګولو او مالدارۍ وزارت د سویابینو د ترویج او پراختیا په پار په مرکز او ولایتونو کې بزګرانو ته د سویابینو ننداریزې کروندې هم جوړکړي دي.
