د کندهار درو ولسوالیو کې د وټرنرۍ کلینیکونه ګټې اخيستنې ته وسپارل شول
۱۲ وږی ۱۴۰۳ه.ش
۲۹ صَفَر المُظَفَّر ۱۴۴۶ه.ق
د کندهار د کرنې، اوبو لګولو او مالدارۍ ریاست له خوا افغانستان لپاره د هالینډ کمیټې په تخنیکي همکارۍ د لیرې پرتو ولسواليو د څارویو لپاره د چوپړتیاوو وړاندې کولو د څارویو د مړینې کچې کموالي او پر وخت درملنې په موخه د کندهار نېش، ارغستان او لوړ میوند ولسوالیو کې د ۱۴ زره او ۷۰۰ ډالرو په ارزښت د څارویو درې کلینیکونه جوړ او ګټې اخیستنې ته وسپارل شول.
د یادو کلینیکونو دګټې اخیستنې په مراسمو کې د کندهار د کرنې، اوبو لګولو او مالدارۍ ریاست استازو، د یادو ولسوالیو سیمه ییزو چارواکو، د هالینډ کمېټې استازو او نورو مسئولينو حضور درلود.
دکندهار د کرنې، اوبولګولو او مالدارۍ ریاست چارواکي وایي، چې د مالدارۍ یاد کلینیکونه دافغانستان لپاره د هالینډ کمېټې لخوا جوړ او مسؤل پارا وټرنرانو ته وسپارل شول.
د چارواکو په خبره د کندهار په نېش، ارغستان او لوړ میوند ولسوالیو کې ډېری غټ او واړه څاروي د څارویو د چوپړتیاوو بې برخې وو، چې ددغو کلینیکونو په جوړولو سره د درملو ترڅنګ واکسینونو، درملنې او لازمو مشورو سره د مالدارۍ سکتور کې مثبت بدلون رامنځته کېږي.
یاد وټرنر ډاکټرانو ته د هالینډ کمېټې له لورې شپږ میاشتي د مالدارۍ او وترنرۍ خدمتونو په برخه کې روزنه ورکړل شوې وه؛ چې نن ورته د کلنیک اړوند وسایل او درمل هم ورکړل شو.
دکندهار دکرنې ریاست د چارواکو په خبره د یادو کلینیکونو لپاره یو عراده هونډا موټر سایکل، یو پایه لمریز یخچال، مکمل لمریز سیستم، د وټرنري تخنیکي کڅوړه، لوجستیکي کڅوړه او ګڼ نور وسایل ورکړل شو، ترڅو مالدارانو ته ښه او بهتره چوپړتیاوې وړاندې کړي.
باید وویل شي، چې څو ورځې مخکې د کندهار دغورک او سپین بولدک په ولسوالیو کې هم د څارویو دوه کلینیکونه ګټې اخستنې ته سپارل شوي دي.
