فراه کې ۱۲۰۰ راستانه شویو کورنيو ته د غنمو او نغدو پیسو وېش لړۍ پيل شوه
۱۵ سلواغه ۱۴۰۴ه.ش
۱۶ شَعبان المُعَظّم ۱۴۴۷ه.ق
د عاليقدر امیرالمؤمنین حفظهالله د فرمان پر بنسټ، په فراه ولایت کې د نویو راستانه شویو کډوالو کورنیو لپاره د غنمو او نغدي مرستو د وېش بهیر د دغه ولایت د والي ملا محمد حافظ مجاهد، د ولایت مقام د دفتر رییس ملا امین الله غازي، مرکزي کمېټې مسؤل مولوي قدرت الله حقیار، مستوفيت مقام مستوفي مولوي شفیع الله فائز، د کرنې رییس مولوي پير محمد حليمي، کډوالو او بېرته راستنيدونکو چارو رییس مولوي عبدالرحمن حبيب زی، د اطلاعاتو او فرهنګ رییس محمد عبدالحي سباوون، د صنعت او سوداګرۍ رییس حافظ شمس الحق اجمل او یوشمېر نورو سیمه ییزو چارواکو په شتون کې پیل شو.
د دغې لړۍ د پرانيستې پر مهال د مرکزي کمېټې مسؤل مولوي قدرت الله حقیار له ټولو کډوالو څخه وغوښتل؛ چې په هېواد کې بشپړ امنیت ټینګ شوی دی او دوی هم کولای شي، چې په ارامه فضا کې د خپلو امنيتي ځواکونو ترڅنګ واوسي او خپل ژوند ته په ډېره ډاډه توګه سره دوام ورکړي.
په همدې حال کې د فراه د کرنې، اوبو لګولو او مالدارۍ رییس مولوي پير محمد حليمي وویل؛ چې دغه مرسته د ا.ا.ا د عاليقدر امير المؤمنين حفظه الله په ځانګړې پيروزینه او فرمان د کرنې، اوبو لګولو او مالدارۍ رياست له لوري د کډوالو او بېرته راستنيدونکو چارو رياست په همغږي او همکاري د دغه ولایت ۱۲۰۰ کډوالو کورنيو ته وېشل کېږي.
نوموړي همدارنګه زياته کړه، چې په دې مرسته کې له پاکستان او ایران هېوادونو څخه په زوره د را ایستل شوېو کورنيو له جملي هرې کډوالې کورنۍ ته ۲۵۰ کيلو ګرامه غنم او پنځه زره نغدې افغانۍ وېشل کېږي.
بل خوا د خدا رحیم افغان او الف محمد په نومونو له مرستې دوه تنه برخوال بيا له یادې مرستې خوښې څرګندوي او وايې؛ چې د دغو غنمو او نغدو پیسو پر مټ یې ورځنۍ ستونزې هوارېږي.
نوموړو همدارنګه د ا.ا.ا او همکارو بنسټونو له مسؤلينو څخه د روغتیا، زده کړو، څښاک پاکو اوبو او سرپناوو د اساسي ستونزو د هواري او رسېدنې غوښتنه هم وکړه.
بايد وويل شي، چې دغه مرسته د ا.ا.ا د حمايتي برنامو په چوکاټ کې د کډوالو او بېرته راستنيدونکو بېړنیو حالاتو ته د رسېدنې او لاسنیوي په موخه وېشل کېږي.
