د تشکیلاتي ستونزو تشخیص او حل په پار د کرنې وزارت با صلاحیته پلاوی ننګرهار ولایت ته سفر وکړ
۲۶ لړم ۱۴۰۳ه.ش
۱۴ جُمَادَى الأول ۱۴۴۶ه.ق
د کرنې، اوبولګولو او مالدارۍ وزارت د بشري سرچینو لوی رییس محمد عثمان ترابي په مشرۍ باصلاحیته پلاوي ننګرهار ته د سفر په ترڅ کې ددې ریاست د تشکیلاتي ستونزو تشخیص، حل لارو پیداکولو او نورو اړونده برخو کې د اسانتیا رامنځته کولو په پار د ننګرهار دکرنې ریاست له کارکوونکو سره وکتل .
ددې کتنې په ترڅ کې د ننګرهار د کرنې ریاست د عشر امر مولوي سلیمان اسامه یاد پلاوی ته د ښه راغلاست ترڅنګ وویل، چې د مشرانو راتګ، د نږدې څخه د ستونزو تشخیص او ورته د حل لارې لتول کارکوونکو ته مثبته روحیه ورکوي، او کرنې ریاست په استازولۍ د هر راز همکارۍ ډاډ ورکړ.
په ورته وخت کې د ننګرهار د کرنې ریاست مالي او اداري مدیر قدرت الله دولتزی د ننګرهار کرنې ریاست تشکیلاتي، اداري او امکاناتو په برخه کې خپلې ستونزې، غوښتنې او وړاندیزونه د بشري سرچینو رییس سره شریکه کړه.
نوموړې په تشکیل کې دمحاسبې، اداري مدیرانو او مطبوعاتو د بستونو او دظرفیت لوړنې ورکشاپونو غوښتنه هم وکړه.
د کرنې، اوبو لګولو او مالدارۍ وزارت د بشري سرچینو رییس حاجي عثمان ترابي د ننګرهار د کرنې ریاست کارکوونکو ته د ستونزو حل ډاډ ورکړ؛ او ژمنه یي وکړه چې د ننګرهار ولایت کاري حجم او اړتیا ته په کتو ځني بستونه اضافه کړي.
نوموړې وویل په تشکیلاتو کې ستونزې موجودې وې، چې تر ډېره بریده حل شوی او په راتلونکی کې به پاتي ستونزې هم حل شي.
دغه راز د بشري سرچینو ریاست له لورې د ننګرهار د کرنې ریاست کارکوونکو د ظرفیت لوړونې درې ورځنی ورکشاپ هم په لاره اچول شوی وو؛چې نن پاي ته ورسېده.
