هلمند کې د شاتو مچیو فارم لرونکو ته د کنې ضد درمل ووېشل شول
۱۰ کب ۱۳۹۸
د هلمند د کرنې، اوبولګولو او مالدارۍ ریاست چارواکي وایي، چې په دې ولایت کې د شاتو مچیو د کاروبار د لاغوړېدا په پار د شاتو مچیو فارم لرونکو ته د روزنیزو پروګرامونو ترڅنګ په بېلابېلو برخو کې له دوی سره مرستې اوهمکارۍ کوي.
د هلمند د کرنې ریاست چارواکي وایي، چې د شاتو مچیو روزونکو او فارم لرونکو سره د مرستې اوهمکاریو په دوام داځل ددې ولایت د شاتو مچیو پر یوشمېر مخکښو فارم لرونکو د شاتو مچیو د کنې ضد درې ډوله درمل « فارملیک اسید، اوګزالیک اسید او ټآیموار» وېشلي دي او فارم لرونکو ته د ناروغیو او درملنې په برخه کې عملي او نظري پوهاوی هم ور کړی دی.
د هلمند په ولایت کې دشاتو ۳۵۰ فارمونه شتون لري، چې له دې ډلې ۲۰۰ یې د کرنې ریاست او ۱۵۰ فارمونه یې د یوشمېر موسسو په همکارۍ رغول شوي دي.
په هلمند کې د مچیو د روزنې زمینه مساعده ده او دا مهال په دې ولایت کې یوشمېر کسانو شاتو مچیو روزلو ته مخه کړي، چې دلته یې روزنه وکړی او ترې ښه عسل تر لاسه کړي.
د افغانستان سوچه شات په کور دننه او له هېواده بهر په ميليونونه پېرېدونکي لري.
افغانستان د شاتو مچيو روزلو او شاتو توليد لپاره مناسبه هوا او چاپيريال لري او دا ددې لامیل شوې، چې په دې هېواد کې د شاتو مچيو روزلو صنعت ورځ تر بلې وده وکړي.
