هلمند کې د ځمکې غصب مخنیوي تخنیکي پلاوي غونډه دائره شوه
![هلمند کې د ځمکې غصب مخنیوي تخنیکي پلاوي غونډه دائره شوه](https://www.mail.gov.af/sites/default/files/2024-08/whatsapp_image_2024-08-27_at_11.31.40_d8c1714d.jpg)
۶ وږی ۱۴۰۳ه.ش
۲۳ صَفَر المُظَفَّر ۱۴۴۶ه.ق
د هلمند ولایت د ځمکې د غصب مخنيوي او غصب شویو ځمکو د تثبیت تخنیکي پلاوي خپله نوبتي غونډه ترسره کړه.
په یاده غونډه کې د یادې کمېټې رییس الحاج مولوی نیاز محمد وهاج تر څنګ دهلمند ولایت د استخباراتو ریاست رییس الحاج مولوی ناظم، د امنیې قوماندانۍ مرستیال الحاج ملا اغاولي نوراني، د کور او ښارجوړولو چارو رییس الحاج مولوي نیک محمدمعتصم، د سرحدونو او قومونو چارو رییس الحاج مولوي عبدالهادي حماد، د هلمند مستوفي الحاج ملا نعمت الله مغیره، د امارتي قضایاو آمر مولوي عبدالقاهر عاصم او د ځمکو د تنظيم آمریت کارمند انجنیر حامد بشیري هم حضور درلود.
ددې غونډې په ترڅ کې د ولایت مقام سره د ګډ مجلس پر هغو موضوعاتو بحث او خبرې و شوې، چې تېره ورځ ورباندې بحث او خبرې اترې شوې وې.
همدارنګه په یاده ناسته کې د مارجې - لښکرګاه پر عمومي شهراء او په لښکرګاه ښار کې داخل او له ښاره د باندې پر متصرفه ذوالیدي ځمکو د نوو ابادیو ، سوداګریزو ځایونو او نورو تاسیساتو د رغولو په اړه د تخنیکي پلاوي ګډونوالو ترمنځ بحث او خبرې وسوې ، په دې اړه پریکړه وسوه چې د نافذه قوانینو ، لوایحو او فرامینو مطابق دې هیڅ چاته ترهغو چې په دغسې مواردو کې عمومي حکم نه وي راغلی ، د کار او ابادیو ترسره کولو اجازه نه ورکول کیږي ترڅو امارتي ځمکې په بېلابېلو پلمو د اشخاصو او افرادو لخوا غصب نشي.
دغه راز په نننۍ غونډه، کې د مارجې ولسوالی د بند پړاو د ځمکې د غصب ارزونې په موخه د یوه ګډ پلاوي ګمارنې پریکړه وسوه ترڅو د یادې ځمکې موجوده حالت ارزیابي او ګذارش یې تخنیکي پلاوي ته وړاندې کړي.
ددې ترڅنګ په دغه ناسته کې د بولان سیمې د حاجي ادریس په نوم ښارګوټي کې د یو محراب جامع جومات جوړولو موضوع چې پر امارتي ځمکه یې پلان ترتیب شوی دی بحث او خبرې وشوې، د غونډې ګډونوالو پریکړه وکړه چې د یادې ځمکې په اړه دې یو ګډ پلاوی چې په ترکیب کې یې د ښارجوړولو رییس، لښکرګاه ښاروال، د علماؤ شورا او ولایت مقام استازي شامل وي تعین شي، ترڅو ددغې ځمکې په اړه خپلې پلټنې او ارزونې بشپړ او راتلونکي غونډې ته خپل راپور وړاندې کړي.
وروستیو کې تخنیکي پلاوي د ځینو انفرادي اشخاصو پر عرایضو او موضوعاتو خبرې وشوې، د یادو اشخاصو د ستونزو حل په برخه کې د اصولي اقداماتو ترسره کولو پرېکړه وشوه.