د ځمکو چارو رییس د ملا تره خېل په ښارګوټي کې د سروې ټيمونو سره ناسته ترسره کړه
۵ غویی ۱۴۰۳ه.ش
۱۵ شَوّال المُکَرَّم ۱۴۴۵ه.ق
دکرنې، اوبولګولو او مالدارۍ وزارت د اراضۍ رییس مولوي محمود مظلوم د ملا تره خېل په ښارګوټي کې په دندو بوخت د سروې ټيمونو سره د هغو د دندو او اجراآتو په اړه ناسته ترسره کړه.
په ياده غونډه کې د اراضۍ لوی رییس مولوي محمود مظلوم، د استملاک او بيا مېشتېدنې عمومي رییس مولوي عبدالعلي عمري، د غير رسمي ښاري سيمو د ثبت رییس مولوي عبدالصمد پاڅون او د یاد ښارګوټي د سروې ټيمونو ګډون درلود.
په پیل کې د اراضۍ لوی رییس مولوي محمود مظلوم او د استملاک او بيا مېشتېدنې عمومي رییس مولوي عبدالعلي عمري په خپل وار د دغه سروې د ارزښت په اړه خبرې وکړې او همداراز په ياد ښارګوټي کې د ټيمونو د زیار او کوښښ څخه يې هم مننه وکړه.
د اراضۍ ریاست لوی رییس وويل: «خوښ یم چې د هېواد د پرمختګ او سوکالۍ په برخه کې زیار باسو او له الله تعالی نه غواړم، چې نور هم د ښه کارونو او خلکو ته د خدمت کولو توفيق موږ ټولو ته راپه برخه کړي».
د اراضۍ لوی رییس کارکوونکو ته په خپلو دندو کې له خلکو سره په ښه چلند وهڅول او ټولو ته يې لارښوونه وکړه، چې په خپلو دندو کې له پوره اخلاص او صداقت څخه کار واخلي.
همداراز د استملاک او بيا مېشتېدنې عمومي رییس مولوي عبدالعلي عمري د اراضۍ لوی رییس د خبرو په تاييد وويل، چې په دې ښارګوټي کې مسکین او بېوزله خلګ ژوند کوي نو ستاسو دنده دا ده، چې د هېچا حق تر پښو لاندې نشي او کوښښ وکړئ حق خپل حقدار ته وسپارل شي.
په پای کې په یاد ښارګوټي کې بوخت د ټيمونو مسؤلینو د خپل ستونزو د حل لپاره يو شمېر وړاندیزونه هم د اراضۍ ریاست لوی رئیس سره شريک کړل، چې ښاغلي مظلوم د مسؤلینو د ستونزو او وړاندیزونو تر اورېدو وروسته له دوی سره د هر راز همکارۍ ژمنه وکړه.
