د پکتیا ولایت د غصب مخنیوی او غصب شویو ځمکو د تشخیص او تثبیت تخنیکي پلاوي پنځمه ناسته وشوه
۱۹ لېندۍ ۱۴۰۱ه.ش
۱۶ جمادي اﻷول ۱۴۴۴ ه.ق
د پکتیا ولایت د غصب مخنیوی او غصب شویو ځمکو د تشخیص او تثبیت تخنیکي پلاوي پنځمه ناسته ترسره کړه. یاده غونډه چې د پکتیا ولایت د کرنې په ریاست کې جوړه شوې وه پکې د غصب د مخنیوي او غصب شویو ځمکو د تشخیص او تثبیت پلاوي ټولو غړو ګډون درولود.
په دې غونډه کې د پکتیا ولایت د غصب مخنیوی او د غصب شویو ځمکو بېرتله راګرځولو د تخنیکي پلاوي رییس او ټولو غړو په نوبتي ډول د راتلونکې دوشنبې ورځې لپاره په عملي پلان او طرحه خپل نظرونه وړاندې کړل.
د غونډې په جریان کې د راتلونکې دوشنبې ورځې لپاره عملي پلان ترتیب شو او همدارنګه په یاده غونډه کې پرېکړې وشوې، چې د خلکو د عامه پوهاوي په پار باید غږیزو او تصویري رسنیو ته د غصب د مخنیوی او غصب شوو ځمکو د استرداد لایحې د توشیح او انفاذ او همدارنګه په یاده برخه کې د تخنیکي پلاوي د رامنځ ته کېدو او د هغوی د چارو اړوند اعلانات ورکړل شي او همدارنګه د جامع مسجدونو خطیبان خلکو ته د غصب د حراموالی او ګناه اړوند وعظ او تقریر وکړي. دغه راز په اوونۍ کې باید دوه ورځې مشخصې شي چې یوه ورځ یې د پلان جوړولو لپاره او بله ورځ د هماغه پلان د عملي کولو لپاره کار وشي. ترڅنګ یې د تخنیکی کمېټې پلان باید په دقت سره ترتیب او وزارت ته واستول شي همداراز د تېرې اونۍ کاري راپور باید په لیکلې بڼه د مسؤلینو سره شریک شي. سربېره پر دې د غونډو اجنډا باید د تخنیکي پلاوي رئیس، سکرتر او کادستري سروې د مسؤل لخوا ترتیب شي او د ټولو ادارو څخه ددوی د غصب شوو ځمکو او جایدادونو اړوند رسمي معلومات وغوښتل شي. په ورته وخت کې د تخنیکي پلاوي د مجالسو پرېکړې باید په جلا کتاب کې په منظم ډول ولیکل او د پکتیا ولایت په سطحه باید یوه غونډه جوړه شي چې پکې د هرې سیمې او هر قوم مشران ګډون ولري او د غصب د مخنیوی او غصب شوو ځمکو د استرداد مقررې او همدرانګه د غصب د مخنیوي او غصب شوو ځمکو د تخنیکي هیئت د چارو اړوند عامه پوهاوی ورکړل شي.
