د بلخ ولایت دهدادي کرنیز څېړنیز فارم کې د کروندې ورځ ونمانځل شوه
۱۹ غویی ۱۴۰۵ه.ش
۲۲ ذُو ٱلْقَعْدَةِ ۱۴۴۷ه.ق
د بلخ ولایت د دهدادي ولسوالی د کرنیزو څېړنو په فارم کې د کروندې ورځې پروګرام د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدراعظم عثماني په حضور کې، د بلخ د کرنې ریاست له لوري ترسره شو.
په دغه پروګرام کې د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدراعظم عثماني، د کرنیزو څېړنو انستیتوت مسؤلینو، د اړوندو ادارو استازو، د همکارو بنسټونو مسؤلینو، په شمال زون کې د اصلاح شویو تخمونو د تولید شرکتونو رئیسانو، د بلخ د کرنې ریاست کارکوونکو او یو شمېر بزګرانو ګډون کړی و.
د پروګرام په ترڅ کې اړوندو چارواکو د کرنیزو څېړنو د اهمیت، د څېړنیزو تجربو د پایلو او د کرنیزو تولیداتو په وده کې د هغو د رول په اړه معلومات وړاندې کړل. همدارنګه، د فارم د فعالیتونو، د ۱۴۰۴ او ۱۴۰۵ کلونو د پروګرامونو د تطبیق او د څېړنیزو لاسته راوړنو راپور هم وړاندې شو.
ګډونوالو د دهدادي کرنیز څېړنیز فارم له بېلابېلو برخو څخه، چې پکې د غلهجاتو برخه، د اصلاح شویو تخمونو تولید او نورې څېړنیزې څانګې شاملې وې، لیدنه هم وکړه.
مسؤلین وایي، د کرنیزو څېړنو پراختیا او د باکیفیته تولیداتو ملاتړ د دې وزارت له مهمو لومړیتوبونو څخه شمېرل کېږي.
