د کندهار ډنډ ولسوالی کې څه باندې ۳۰ زره څاروي د درېیو ناروغیو پر وړاندې واکسین شول
۳ لړم ۱۴۰۴ هـ.ش
۳ جُمَادَى الأول ۱۴۴۷ هـ.ق
د کندهار د کرنې، اوبو لګولو او مالدارۍ ریاست تر څارني لاندې ددې ولایت د ډنډ په ولسوالی کې ۳۰ زره او ۳۷۵ څاروي د طاعون، ریخک او داخلي او خارجي پرازیټونو پر وړاندې واکسین شوي دي.
د ډنډ ولسوالی د مالدارۍ مسؤل ډاکټر احسان الله روښان وایي، چې په یادو واکسینونو کې یې ۹ زره څاروي د طاعون ناروغۍ د مخنیوي لپاره د ملګرو ملتونو د خوړو او کرنې ادارې «اف.اې.او» له لوري، ۱۵ زره ۵۰۰ څاروي د خارجي او داخلي پرازیټونو او ۵ زره ۸۷۵ څاروي د ریخک ناروغۍ د مخنیوي په موخه د هالنډ کمیټې له لوري واکسین شوي دي.
د دې کمپاین څخه موخه د څارویو وژونکو ناروغیو مخنیوی، د مالدارۍ په برخه کې وقایوي تدابیر نیول، د مالدارانو اقتصادي زیانونو کمول، د مالدارانو اقتصادي ملاتړ او مالدارۍ ته په سالمه توګه وده ورکول دي.
د یادونې وړ ده، چې څو ورځي وړاندې د کندهار دکرنې ریاست په هڅه، د اروپایي ټولني په مالي ملاتړ او هالنډ کمیټې په تخنیکي همکاري د کندهار معروف او خاکریز ولسوالیو کې هم څه کم ۶ زره کوچني څاروي د ریخک او چنجیو ضد وقایوي درملنه وشوه، چې ترڅنګ یې اوس مهال په نورو ولسوالیو کې د تطبیق چاري لاهم رواني دي.
