پکتیا کې ۱۲۵ تنو مالدارانو سره د مالدارۍ توکو مرسته وشوه
۱۴ زمری ۱۴۰۴ هـ.ش
۱۱ صَفَر المُظَفَّر ۱۴۴۷ هـ.ق
د پکتیا د کرنې، اوبو لګولو او مالدارۍ ریاست له خوا د اړیکو دفتر مؤسسې په مرسته د دې ولایت د روحانی بابا ولسوالی کې پر ۱۲۵ تنو مالدارانو باندې د مالدارۍ بستې ووېشل شوې.
په دغو وېشل شویو توکو کې: «هواکش، اخور، داوبولوښي، دچنجو ضد درمل، ویټامین، شېدو لوشلو سطل، د پرازیټ ضد درمل، دوه جوړی بوټونه، وړوکې سطل، ۱۰ لیتره درمل شیندلو پمب، ۷ کیلوګرامه سپینه سره، د حفظ الصحې کیټ، لکتو میټر، څلور متره پلاستیک، او دشېدو د فلتر لوښي» شامل دي، چې د روحاني بابا ولسوالی کې پر اړمنو مالدارانو وېشل شوي دي.
په یادو مراسمو کې د پکتیا دکرنې، اوبولګولو او مالدارۍ ریاست د مالدارۍ کارکونکې، د یادې ولسوالۍ مسئولیونو، دهمکارې برنامې اړیکو دفتر مسئول او دسیمې مالدارانو ګډون درلود.
د پکتیا د کرنې ریاست د مالدارۍ مدیر عبدالبصیر کوچی په خپلو خبرو کې د اړیکو دفتر کړنې وستایلې او همدارنګه مالدارانو څخه یې غوښتنه وکړه، ترڅو له دغو توکو څخه په سمه توګه استفاده وکړي.
ښاغلی کوچی زیاته کړه، چې نور باید مالدارۍ ته وده ورکړو ترڅو د نورو هېوادونو له اړتیا خلاص شو او د خپل هېواد محصولاتو څخه استفاده وکړو.
د یادونې وړ ده چې، له دې وړاندې یادو مالدارانو ته ددغو صحي وسایلو د استعمال په اړه روزنه هم ورکړل شوې وه.ش
