د ننګرهار دکرنې رییس د بزګرانو ستونزو اورېدو په موخه خوږیاڼو ولسوالی ته سفر وکړ
![د ننګرهار دکرنې رییس د بزګرانو ستونزو اورېدو په موخه خوږیاڼو ولسوالی ته سفر وکړ](https://www.mail.gov.af/sites/default/files/2024-08/img-20240826-wa0107.jpg)
۵ وږی ۱۴۰۳ه.ش
۲۲ صَفَر المُظَفَّر ۱۴۴۶ه.ق
د ننګرهار د کرنې، اوبولګولو او مالدارۍ رییس مولوي محمد ولي محسن د بزګرانو د ستونزو د حل او کرنې د پراختیا په موخه خوږیاڼو ولسوالۍ ته سفر وکړ. هغه د خوږیاڼو ولسوالۍ له ولسوال قاري عبد الله رحماني، امنیه قومندان مولوي بدرالدین، استخباراتو مدیر قاري انعام الله او ترویج مدیرانو سره ناسته وکړه او د کرنې او مالدارۍ په برخه کې یې د ستونزو په اړه خبرې وکړې.
ولسوال قاري عبد الله رحماني په دې ناسته کې د ترویج ودانیو رغولو، ګودامونو، روغنیاتو، ځنګلونو د پرېکولو مخنیوي، بڼوالۍ، اصلاح شويو تخمونو، مالدارۍ واکسینونو، حیواني خوراکي توکو او نورو اړونده برخو کې خپلې ستونزې او غوښتنې مطرح کړل.
د ننګرهار دکرنې رییس مولوي محمد ولي محسن د بزګرانو او مالدارانو د ستونزو د حل او پرمختګ لپاره د هر راز همکارۍ ډاډ ورکړ.
هغه وویل، چې د خوږیاڼو ولسوالۍ اراضي د کرنې او بڼوالۍ لپاره ښه مناسبه ده، او ژمنه یې وکړه چې د کرنې ریاست او همکارو موسساتو له لارې به مؤثرې پروژې پلي کړي. د دې پروژو موخه به د اصلاح شویو تخمونو ترویج، څارویو ته واکسینونه، مالدارۍ پرمختګ، حیواني خوراکي توکو ویش او بازار موندنه وي.
ښاغلي محسن همدارنګه د عشر او زکات مسؤلینو ته سپارښتنه وکړه، چې په خپلو کارونو کې روڼتیا او دیانت ولري او د ا.ا.ا کړنلارې مطابق عمل وکړي. د ننګرهار کرنې ریاست هر کال په زرګونه بزګرانو او مالدارانو ته د کرنې او مالدارۍ په برخه کې مرستې وړاندې کوي.