د خصوصي سکټور د پراختیا ریاست او بازارموندنې پروژې سره د کرنې وزیر غونډه؛ د کرنیزو محصولاتو بازارموندنې او د کرنې په سکټور کې د پانګونې پر جذبولو خبرې اترې
۲۶ لیندۍ ۱۳۹۹
د کرنې، اوبولګولو او مالدارۍ وزیر انوارالحق احدي په شتون کې، د کرنیزو محصولاتو د بازارموندنې پروژې او د خصوصي سکټور د پراختیا ریاست له چارواکو سره، د یادو برخو د فعالیتونو او راتلونکو برنامو په هکله د کرنې وزیر په دفتر کې غونډه په لاره واچول شوه.
ددې غونډې په پیل کې، د کرنې وزارت د خصوصي سکټور د پراختیا رییس حبیب الله حبیبي، ددې ریاست د لاسته راوړنو، فعالیتونو او راتلونکو برنامو په هکله د کرنې وزیر ته مالومات وړاندې کړه. ښاغلی حبیب وویل، چې د خصوصي سکټور په همغږۍ پنځه نړیوال نندارتونونه په لاره اچول شوي دي، چې له بهرنیو نندارتونونو څخه د هېواد د کرنیزو محصولاتو سوداګرو ته د ۲۳۵ میلیونه ډالرو په ارزښت قراردادونه او له درو ملي نندارتونونو څخه د ۲۳۴ میلیونه افغانیو په ارزښت قراردادونه تر لاسه شوي دي. د خصوصي سکټور د پراختیا رییس دغه راز زیاته کړه، چې د کرنې په سکټور کې تر دې دمه ۷۶۲ کرنیز شرکتونه جوړ شوي، چې ددغو شرکتونو د پانګونې لومړنۍ کچه څه باندې اته میلیارډه افغانۍ ده. هغه وویل، چې د کرنې وزارت تر دې دمه توانېدلی دی، چې د نړیوال سوداګریزې ادارې ۹۰ سلنه ژمنې پلي کړي. حبیبي وویل، چې کرنیزې ټولنې جوړې شوي دي او دکرنې او مالدارۍ په سکټور کې د پانګونې ۱۹ فرصتونه پېژندل شوي او ټاکل شوې، چې راتلونکی کال د دوو ملي نندارتونونو سربېره د هېواد په اوو زونونو کې اووه نندارتونونه او دغه راز د کرنې په سکټور کې پنځه نړیوال نندارتونونه په لاره واچول شي.
ښاغلی حبیبي د شېدې د پروسس له فابریکو سره د ختیځو سیمو د شېدو تولیدوونکو د نښلولو خبره وکړه او ویې ویل، چې پر بنسټ یې د هېواد له ختیځ څخه د اوونۍ ۱۰ زره لیټره شېدې د امید بهار د پروسس فابریکې ته لېږدول کیږي. د خصوصي سکټور د پارختیا رییس وویل، چې د چایو پر سپینوونکو د تعرفې په لوړولو سره دوی توانېدلي دي، چې د کورنیو شېدو د تقاضا کچه لوړ کړي.
تر هغه وروسته، د کرنیزو محصولاتو د بازارموندنې د پروژې رییس، الن سفري، د پرزنټیشن په وړاندې کولو سره وویل، چې د دوی پروژه تر ۲۰۲۳ کال پورې فعالیت لري او پر درو اساسي برخو تولید، بازارموندنه او سوداګریزو اسانتیاوو برخو کې کار کوي.
د کرنیزو محصولاتو د بازار موندنې پروژه، د امریکا د متحده ایالاتو د نړېوالې پراختیایي ادارې له خوا ملاتړ کیږي.
د کرنیزو محصولاتو د بازارموندنې د پروژې رییس وویل، چې یاده پروژه د خپلو درو کاري برخو لپاره پنځه اسټراټیژۍ تعقیبوي، چې په کې کرنیزو محصولاتو صادراتو زیاتوالي ته زمینه برابرول، د بېلابېلو کرنیزو محصولاتو زیاتوالی، افغان صادروونکو ته د نویو بهرنیو بازارونو پراختیا، د کرنیزو محصولاتو ارزښت لوړول او په هغو ۲۹ ولسوالیو کې چې لږ پراختیایي کارونه په کې شوي د تولید د کچې لوړل شامل دي.
تر هغه وروسته، د کرنې، اوبولګولو او مالدارۍ وزیر انوارالحق احدي، د خصوصي سکټور د پراختیا رییس د راپور له وړاندې کولو څخه د مننې ترڅنګ وویل، چې د بزګرانو د لاپیاوړتیا په پار اړتیا ده، چې بېلابېلي ټولنې جوړې شي، ترڅو دولت ته د تولیدوونکو ډېرشمېر آدرسونه شتون ولري.
ښاغلی احدي وویل، چې د خصوصي سکټور د برنامو اغېزمنتوب باید په بېلابېلو برخو کې لاډېر شي، ترڅو بازارموندنې او پېر-پلور ته لا پراخې زمینې برابرې شي او دغه راز یوشمېر تولیداتو لپاره باید ځانګړې طرحې رامنځته شي.
دغه راز دکرنې وزیر د کرنیزو محصولاتو د بازارموندنې د پروژې رییس د پرزنټیشن او مالوماتو وړاندې کولو څخه مننه وکړه، او ویې ویل، چې باید ددغو فعالیتونو اغېزمنتوب لاډېر شي او پر مارکېټ پانګونه او دغه راز بېلابېلو محصولاتو صادراتو لپاره زمینې لاډېرې شي. د کرنې وزیر د تصدیق ورکولو د سیسټم پر جوړولو او د لابراټوارونو پر تجهیز خبرې وکړې او دا یې پرمختللو هېوادونو ته د صادراتو د زیاتوالي په پار اړین وبلل. ښاغلی احدي دغه راز د کرنیزو محصولاتو د بازارموندنې پروژې له رییس څخه وغوښتل، چې خپل د ۲۰۲۱ ام کال د عمل پلان له ده سره شریک کړي تر څو په ګډه لا اغېزناکې پرنامې عملي شي.
