کندهار کې د اصلاح شویو غنمو د وېش لړۍ پیل شو
![کندهار کې د اصلاح شویو غنمو د وېش لړۍ پیل شو](https://www.mail.gov.af/sites/default/files/2019-12/80539375_2926647557359825_8579664436137033728_n.jpg)
۳ مرغومی ۱۳۹۸
د کندهار د کرنې، اوبولګولو او مالدارۍ ریاست د ملګرو ملتونو د خوړو او کرنې ادارې «FAO» او د «اوچا» ادارې په همکارۍ ددې ولایت پر بزګرانو د غنمو د اصلاح شویو تخمونو د وېش لړۍ پیل کړی دی.
د کندهار د کرنې ریاست چارواکي وایي، چې په دې لړۍ کې ددې ولایت د اتو ولسوالیو په ۱۱ زره او ۸۰۰ بزګرانو د غنمو اصلاح شوي تخمونه او کیمیاوي سرې وېشل کیږي. دغه لړۍ نن د کندهار د ارغنداب ولسوالۍ څخه د کندهار والي حیات الله حیات له خوا رسماً پیل شو. د غنمو اصلاح شوي تخمونه په اتو ولسوالیو کې پر بزګرانو د مني موسم د کرکېلي په پار وېشل کیږي.
د کندهار د کرنې ریاست چارواکي وایي، چې ددې پروژې په پلي کولو سره به د یادو ولسوالیو د غنمو په حاصلاتو کې له ۲۵ تر ۳۰ سلنه زیاتوالی راشي او ددې ترڅنګ د بل کال لپاره به هم اصلاح شوي تخمونه تکثیر شي.
له دغو مرستو برخمن شوي بزګران د کرنې وزارت هلې ځلې وستایلې او د نورو مرستو غوښتونکي شول.