کندهار کې د چرګانو روزنې فارمونو څخه د ورځې ۳۵۰ زره هګۍ او زرګونه کیلوګرامه غوښته تولیدېږي
د کندهار د کرنې، اوبولګولو او مالدارۍ ریاست چارواکي وایي، چې په دې ولایت کې د چرګانو روزنې سکټور په پراخېدو ده او ورځ تربلې پراخېږي. د کندهار د کرنې ریاست د چارواکو په خبره په دې ولایت کې د چرګانو روزنې یوزر او ۲۰۰ لوی او واړه فارمونه شتون لري، چې د ورځې زرګونه کیلو ګرامه غوښه او ۳۵۰ زره هګۍ تولیدوي.
د کندهار د کرنې ریاست چارواکي وایي، چې د دغو فارمونو جوړول د کارموندنې ترڅنګ د چرګانو د غوښو د تولید په برخه کې یاد ولایت ځان بساینې ته نږدې کوی او ددې ولایت ګاونډ ولایتونه هم کولای شي، چې له دغو فارمون څخه ګټه پورته کړي.
د چارواکو په خبره زیاتره فارمونه د یاد ولایت په دامان، ژېړۍ، ارغنداب، ډنډ، پنجوايي، میوند او ارغستان ولسوالیو کې شتون لري، چې په دغو فارمونو کې زرګونو کسانو ته د کار زمینه هم برابره شوې ده.
ددغو فارمونو د جوړولو موخه د بېوزلو کورنیو اقتصادي وده او ملاتړ او په کور دننه مېرمنو ته د کار زمینې برابرول او ترڅنګ یې له بهره د غوښینو چرګانو د وارداتو کچه ټېټول دي.
دکرنې، اوبولګولو او مالدارۍ وزارت د چارواکو په خبره په هېواد کې ۱۲ زره او ۵۰۰ د چرګانو د روزنې فارمونه شته، چې لویه برخه یې په وروستیو کلونوکې کې جوړ او تر ډېره د چرګانو د غوښو د تولید برخه کې فعال دي.
باید وویل شي، چې افغانستان د چرګانو غوښې د تولید په برخه کې ځان بساینې ته نږدې شوې او ټاکل شوې ده، چې روان کال د چرګانو د غوښو د تولید لسګونه فارمونه جوړ شي، چې تر ډېره د چرګانو د غوښو په برخه کې د افغانستان اړتیا پوره کوی او افغانستان په دې برخه کې پرځان بسیا کېږي.
