د کندهار پنجوایې کې د ۳.۸ میلیونه افغانیو په لګښت یو استنادي دېوال جوړ او ګټې اخیستنې ته وسپارل شو
۲۴ غویی ۱۴۰۴ ه.ش
۱۶ ذُو ٱلْقَعْدَةِ ۱۴۴۶ه.ق
د کندهار د کرنې، اوبو لګولو او مالدارۍ ریاست په پراختیایې بودیجه، د یو خصوصي ودانیز شرکت په تخنیکي همکارۍ د کندهار پنجوایې ولسوالی د بدوان په سیمه کې د ۳.۸ میلیونه افغانیو په لګښت د اوبو مهارولو په موخه یو استنادي دېوال جوړ او ګټې اخیستنې ته وسپارل شو.
د کندهار دکرنې ریاست د مسؤلینو په وینا؛ یاد استنادي دېوال ۲۶۵ متره اوږدوالې، ۱.۵ متره پراخوالې او ۳ متره جګوالې لري، چې د شاوخوا دوو میاشتو په موده کې په اساسي او پایداره ډول جوړ شوی دی، د یاد دېوال د جوړېدو په ترڅ کې ۸ کسانو ته په فني او ۵۰ کسانو ته په غیرفني ډول د کار زمینه هم برابره شوې وه او ترڅنګ یې د کارونو د ښه ترسراوی په موخه د مؤثره ماشینري څخه هم ګټه واخیستل سوه.
یاد جوړ شوی استنادي دېوال څخه موخه د ارغنداب ولسوالۍ د رود څخه د پنجوایې ولسوالی د بدوان ویالۍ ژغورل او ساتنه کول، د پنجوایې ولسوالۍ بزګرانو او مالدارانو ستونزه په اساسي او دوامداره توګه حلول او هغوی ته د اوبو اسانتیاوې برابرول دي.
په ورته مهال د پنجوایې ولسوالی ځایې اوسېدونکي د کندهار د کرنې ریاست څخه زیات خوښ دي، چې د اوبو مهار کولو په موخه ورته اسانتیاوې برابرېږي، چې ورسره سم به د دوی ډېری ستونزې حل شي.
د یادونې وړ ده، چې دوه ورځې وړاندې د کندهار د کرنې ریاست په هڅه، د ملګرو ملتونو دخوړو او کرنې ادارې په مالي ملاتړ او د بشري خیریه مؤسسې په تخنیکي همکاري په نېش، بولدک او شاولیکوټ ولسوالیو کې هم د لسګونه زره امریکایې ډالرو په ارزښت د اوبو زېرمه کولو پنځه چکډېمونه جوړ او ګټې اخیستنې ته سپارل شوي دي.
