د لغمان دکرنې رییس ددې ولایت د ځنګلونو او څړځایونو ټولنو له استازو سره وکتل
دلغمان کرنې،اوبولګولو او مالدارۍ رییس الحاج مولوي محمدولي محسن په خپل کاري دفتر کې د ځنګلونو او څړ ځایونو ساتونکو ټولنو له استازو سره ناسته ترسره کړه.
په دغه ناسته کې دکرنې، اوبولګولواومالدارۍ رییس مولوي محمدولي محسن سربیره د ملګرو ملتونو د خوړو او کرنې اداې د جیف سیون دفتر ولایتي مسؤل محمد یاسین نوري، د مرکز په ګډون دقرغیو او علیشنګ ولسوالیو کې د اته ټولنو استازو او د کرنې ریاست دځنګلاتي ټولنو د انجمنونو دتنظیم مدیر انجنیر ذاهدالله ګډون درلود.
په دې ناسته کې د لغمان دکرنې، اوبولګولو اومالدارۍ رییس الحاج مولوی محمدولي محسن د ناستې ګډونوالو ته سپارښتنه وکړه، چې د خپلو سیمو ځنګلونو او څړځایونو ته جدي پاملرنه اود ساتنې په برخه کې له دې ریاست سره دتل لپاره همکاري وکړي.
ښاغلی محسن وویل: « د ځنګلونو او څړځایونو ساتنه وکړئ، څو دغه طبیعي هستي تخریب او له منځه لاړه نشي. »
دغه راز محسن د ټولنو استازو ته په خطاب کې وویل: «د جیف سیون دفتر له خوا تاسو ته توزیع او شاوخوا سیمو کې کرل شوي روزنه او پالنه یې په درسته توګه ترسره کړئ».
په ورته مهال د ټولنو استازو د کرنې رییس ته ډاډ ورکړ چې د اړوندو سیمو د طبیعي ځنګلونو، څړځایونو او نوي کرل شوو نیالګیو مراقبت ته به جدي پاملرنه کوي.
همداراز دوي یولړ وړاندیزونه او ستونزې هم د ادارې له رییس سره شریکې کړې، چې د کرنې رییس له لوري ورته د حل ډاډ ورکړ شو.
