په طبیعي سرچینو کې د پانګونې او د کار د همغږۍ غونډه؛ د لاسته راوړنو او راتلونکو برنامو وړاندې کول او د اهمیت ارزونه
۱۵ سلواغه ۱۳۹۹
د طبیعي سرچینو په برخه کې د پانګونې او کاري همغږۍ غونډه، د طبیعي سرچینو په برخه کې د بېلابېلو اړوندو بنسټونو د نږدې ۱۰۰ استازو په ګډون سره په انلاین بڼه په لاره واچول شوه.
د غونډې په پیل کې دکرنې، اوبولګولو اومالدارۍ وزیر ډاکټر انوارالحق احدي د طبیعي سرچینو د اهمیت او د ټولنې پر ژوند او اقتصاد د طبیعي سرچینو پر تړاو او اهمیت خبرې وکړي او په دې برخه کې یې دقیقه پانګونې اوهمغږۍ اړین وبلل.
د طبیعي سرچینو په برخه کې د لا ډېرې پانګونې جلب او همغږۍ غونډه، د کوویډ-۱۹ وبا له خپرېدو را په دې خوا په لاره نه و اچول شوې.
د طبیعي سرچینو په برخه کې د کرنې وزارت د شریکانو ترمنځ همغږۍ، چې تمویل کوونکي، نړیوالې موسسې او هېوادني او سیمه ییز هېوادونه په کې شامل و، د پوهې شریکول، راپور ورکول، په طبیعي سرچینو کې پر لاډېرې پانګونې تمرکز ددې غونډې موخې وې.
بېلابېلې برخې، له ډلې د کرنې وزارت د طبیعي سرچینو د تنظیم لوی ریاست او په دې سکټور کې کاري ونډوالو خپلې لاسته راوړنې او برنامې شریکې کړې.
باید وویل شي، چې ددې انلاین غونډې د خبرو پر بنسټ، د کرنې وزارت د طبیعي سرچینو په برخه کې راتلونکی کال نږدې ۱۰ میلیونه ډالره پانګونه کوي، په داسې حال کې، چې د کرنې وزارت کاري ونډوال، چې په کې تمویل کوونکي، نړیوالې موسسې او هېوادنی او سیمه ییزې ادارې شاملي دي د طبیعي سرچینو په برخه کې ۲۶ میلیونه ډالر پانګونه کوي.
