هلمند کې نباتي ناروغیو او افتونو سره د مبارزې کمپاین پیل شو
۱۵ سلواغه ۱۳۹۹
د هلمند د کرنې، اوبولګولو او مالدارۍ ریاست له خوا په دې ولایت کې نباتي ناروغیو او افتونو سره د هر اړخیزې مبارزې کمپاین په لاره اچول شوی دی.
د هلمند د کرنې، اوبولګولو او مالدارۍ رییس زلمی الکو وایي، چې په دې کمپاین کې فني کارکوونکو له خوا بڼوالو او بزګرانو ته د نباتي ناروغیو او افتونو د وقایې هر اړخیزي لارې چارې په عملي او نظري ډول ښودل کېږي.
ښاغلی الکو زیاته کړه، چې ددې کمپاین په ترڅ کې بڼوالو او بزګرانو ته د ترکیبي درملو جوړولو لارې چارې ښودل کېږي او دغه راز ددې پروسې له لارې ۱۵۰ بڼوالو ته بورډومیکسچر وقایوي درمل هم ورکول کېږي.
د هغه په خبره، د ترکیبي درملو په استفادې سره د ونو مضره حشرې، د ونو پر تنو ځالګۍ او بېلابېلې ناروغۍ له منځه ځي، چې په پایله کې ونې او ښاخونه ښه وده او نمو کولی شي.
د هلمند دکرنې ریاست چارواکي وایي دوی هلې ځلې کوي، چې بزګران د کیمیاوي درملو د استفادې پر زیانونو وپوهوي او ددغو خطرنو د مخنیوي په پار د افتونو او ناروغیو مخه په میخانیکي لارو چارو ونیسي ترڅو له روغتیايي او اقتصادي پلوه ګټور تمام شي.
