۱۳۹۸ کې کرنې وزارت، درې زره او ۲۱۰ پراختیایي پروژې پلي کړي دي
۷ کب ۱۳۹۸
ملت ته د حکومت د حساب ورکولو د پروګرام په دوام، د کرنې، اوبولګولو اومالدارۍ وزارت سرپرست او د اوبولګولو او طبیعي سرچینو مرستیال حشمتالله غفوري ددې وزارت کړنې له خلکو سره شریکې کړي.
په دې پروګرام کې دکرنې وزارت د مالي او اداري مرستیال عبدالهادي رفیعي او مسلکي مرستیال محبوبالله ننګ ترڅنګ اطلاعاتو ته د لاس رسي د کمیسیون غړي او خبریالان شتون درلود.
ښاغلي غفوري د کرنې وزارت کړنې بیانولې او وویل، چې د کرنې، اوبولګولو او مالدارۍ وزارت په ۱۳۹۸یم مالي کال کې، د کرنې، اوبولګولو، مالدارۍ، د طبیعي سرچینو د ودې او بیارغونې، د خوړو خوندیتوب او د مېرمنو وړتیالوړولو په بېلابېلو برخو کې، درې زره او ۲۱۰ پراختیایي پروژې پلي او بشپړ کړي دي.
ښاغلي غفوري وویل، چې د کرنې، اوبولګولو او مالدارۍ وزارت د ۱۳۹۸یم مالي کال پراختیایي بودیجه ۷.۹ میلیارډه افغانۍ و، چې له دې ډلې ۷.۷ میلیارډه افغانۍ یې، چې د ټولې بودیجې ۹۸ سلنه جوړ وي؛ د مالیې وزارت له خوا تخصیص تر لاسه کړئ و. تخصیص شوي بودیجې څخه ۷.۴ میلیارډه افغانۍ، چې د ټولې بودیجې ۹۳.۵ سلنه جوړوي لګول شوې ده.
هغه زیاته کړه، چې د کرنې وزارت د ۱۳۹۸یم مالي کال عادي بودیجه ۱.۳۶۲ میلیارډه افغانۍ و، چې له دې ډلې ۱.۲۹۲ میلیارډه افغانۍ یې، چې د بودیجې ۹۵ سلنه جوړوي لګول شوې ده.
۱۳۹۸یم کال کې، د کرنې وزارت درې زره او ۲۱۰ پراختیایي پروژې عملي کړي دي.
د کرنې، اوبولګولو او مالدارۍ وزارت د اوبولګولو او طبیعي سرچینو مرستیال وویل، چې یاد وزارت په ۱۳۹۸ یم کال کې په ټولیزه توګه ۹۱ عمده فعالیتونه «هر فعالیت کې څو پروژې شاملي دي» پلان کړي و، چې له دې ډلې ۵۹ فعالیتونه یې بشپړ کړي دي. ددغو فعالیتو له ډلې ۱۸ نور یې تر کار لاندې او د بشپړېدو په درشل کې دي، پنځه فعالیتونه یې نه دي پیل شوي او د نهو فعالیتونو پلي کېدل پیل شوي و، خو د یوشمېر ستونزو له امله ځنډول شوي دي.
د هغه په خبره، په دې کال کې د وزارت د ټولو فعالیتونو د پرمختګ د في صدي منځنۍ کچه، ۸۰.۳۸ سلنې ته رسیږي.
تېر مالي کال کې، کرنې وزارت د اوبولګولو د ۳۴۴ شبکو د بیارغولو چارې ۸۹ سلنه بشپړ کړي او د لیزرلېول یا ځمکې هوارولو ۸۴ ماشینونه وېشلي دي.
د ښاغلي غفوري په خبره، د کرنې ریاستونو ته ۱۷۰ عرادې ټراکټورونه لېږل او ۱۶ زره او ۸۷ ټنه د غنمو اصلاح شوي تخمونه پېرل او پر بزګرانو وېشل، د شولې او غنمو دوه زره او ۵۲ ننداریزې قطعې جوړول، د اصلاح شویو تخمونو پر تولیدوونکو دوه زره او ۵۰۰ سرټیفیکټونه وېشل، د غنمو یو زر او ۲۵۰ مټریک ټنه تصدیق شوي تخمونه تولیدول له نورو فعالیتونو څخه دي. په دغو فعالیتونو سره د تېر کال په پرتله د غنمو حاصلات ۴۲ سلنه او د وریجو حاصلات نهه سلنه زیات شوي دي.
دغه راز ۷۲۶ سوداګریزې شنې خونې جوړول، د بڼوالۍ د پراختیا ۱۸۰۰ کڅوړې وېشل، ۷۸۹ څېړنیز تجربې پلي کول، ۴۵صفر انرژۍ سړې خونې جوړول، ۶۸۹۱ هکټاره مثمر بڼونه جوړول او د بڼوالۍ حاصلاتو ټولولو ۲۰۰۰ کڅوړې وېشل، د انګورو په ۱۵۰ هکټار بڼونوکې د چیلې سیسټم لګول، د کمپوسټ سرې ۴۹۲ واحدونه جوړول، ۲۳۵ ممیزخونې جوړول، ۵۰۰ مټریک ټنه کیمیاوي سرې وېشل، د پستې ۳۵۰۰ کیلو ګرام تخمونه وېشل، په ۲۱۵ هکټاره سیمه کې د پستې ونو پیوندول په تېر مالي کال کې د کرنې وزارت نورې کړنې دي.
حشمت الله غفوري وویل، چې دغه کړنې ددې لامل شو چې د بڼوالۍ حاصلات تر ۲۵ سلنې زیات شي.
د کرنې وزارت د اوبولګولو او طبیعي سرچینو مرستیال او سرپرست وویل، چې د څلورو لویو او عصري مسلخونو د جوړولو چارې بشپړول، څه باندې شپږ میلیونه او ۵۰۰ زره څارویو ته بېلابېل واکسینونه ورکول، درې میلیون ډوزه حیواني واکسینونه تولیدول، پانګوالو لپاره د چرګانو روزنې ۷۰ سوداګریز فارمونه جوړول، د ګرمو اوبو د کبانو ۸۰ فارمونه او د کبانو دوه تکثیري فارمونه جوړول، د کبانو څلور میلیونه بچې تولیدول، د شېدې ټولولو ۲۹ مرکزونه جوړول او سمبالول، د شاتو مچیو روزلو ۵۰۰ پراختیایې کڅوړې وېشل، د وټرنرۍ ۲۷۰ کلینیکونه جوړول او تجهیزول او ۹ پارا وټرنرانو ته روزنه ورکول، مالدارانو لپاره د څارویو ۳۱۱ مټریک ټنه خوراکي توکي پېرل، د پیله وري ودانۍ جوړول او ګټې اخیستنې ته سپارل، د حیواني خوراکي توکو دوه ګودامونه جوړول، د حیواني علوفې ۲۱۳ ننداریزې کروندې جوړول، په ۲۰۰ هکټاره ځمکه کې علوفې کرل، په کابل کې د لبنیاتو د تر ټولو سترې فابریکې د جوړولو د کار پیل؛ هم د تېر کال د فعالیتونو په ډله کې دي.
هغه زیاته کړه، بلخ کې د پستې ۶۰ زره نیالګیو ته دڅاڅکې اوبوخور سیسټم جوړول، یو زر او ۱۹۰ کورني قوریې جوړول، د ځنګلي نیالګیو ۲۱۷ جریبه قوریې جوړول، ۶۰۲۵ هکټاره څړځایونه بیارغول او ساتل، د طبي نباتاتو ۳۵۰ هکټاره سیمې بیارغول او ساتل، د ملي پارکونو بند امیر او واخان بیارغول او ملاتړ، په غونډیو کې د طبیعي سرچینو د ساتنې په پار یو زر او ۱۰۰ متر مکعب محافظتي بندونه جوړول، د حمایتي، روزنیز او تخنیکي چوپړونو په وړاندې کولو سره د خوست او پکتیا د جلغوزیو ۱۲ سلنه زیاتوالی، د نیالګیو په کېنولو، د انجې د کښت دترویج او شیرین بویې پاللو ته د خلکو د هڅوله له لارې د زرغون کمربند ۱۸۰ زره سیمې بیارغول نور فعالیتونه دي.
په تېر مالي کال کې د ۱۳ قرنطین سټیشنونو لابراټوارونه هم تجهیز شوي دي.
د حشمت الله غفوري په خبره، د کرنې او مالدارۍ په برخه کې د بوختو مېرمنو د وړتیالوړلو په برخه کې هم پراخ فعالیتونه ترسره شوي دي. د شاتو مچیو روزنې ۳۸۰ صندوقونه وېشل،۷۰۰ شېدې ورکوونکي ووزې او ۴۰ خوسکي وېشل، د مالدارۍ او کرنیزو توکو ۳۰۰ بستې او د سبو ۵۰۰ وچوونکي دستګاوې وېشل، د هېواد په کچه ۱۹ زره او ۴۷۴ کورني باغچې جوړول، یو زر او ۸۸۵ وړې شنې خونې جوړول، د چرګانو روزنې ۲۹ زره او ۵۷۰ واړه فارمونه جوړول، د شېدې ټولولو شپږ مرکزونه جوړول او سمبالول او ۶۰۰ مالدارو مېرمنو ته روزنه ورکول او څلور زره او ۲۶۰ مېرمنو لپاره روزنیزې برنامې په لاره اچول هغه کړنې دي، چې د مېرمنو وړتیالوړولو په برخه کې تر سره شوي دي.
ښاغلي غفوري وویل، چې د ۱۳۹۷یم کال په پرتله په ۱۳۹۸یم کال کې د زعفرانو تولید ۲۲ سلنه زیاته شوې ده. دغه راز د زعفرانو د شپږو مرکزونو ایجادول، په هرات، کابل، بلخ او فاریاب کې د زعفرانو د پروسس شپږ مرکزونه جوړول، هرات کې د زعفرانو څېړنیز انسټیټوټ جوړول، د زعفرانو ۴۸۹ ننداریزې قطعې جوړول، پر زعفران کارانو د زعفرانو ۲۲۴ ټنه ښه کیفیت لرونکي پیاز وېشل د کرنې وزارت نور فعالیتونه دي.
د حشمت الله غفوري په وینا د غوزانو، جلغوزې او نورو ځنګلي ونو ۱۹۰ قوریې جوړول او سمبالول، د قوریو جوړولو او په پلاستیکي کڅوړو کې د تخمونو کرولو په برخه کې یو زر او ۱۹۰ سیمه ییزو کورنیو ته روزنه ورکول، د جلغوزې د لازیاتو ځنګلونو ایجادولو په پار د جلغوزې یو زر او ۲۲۰ کیلو ګرامه تخمونه وېشل، د جلغوزې ۳۱۰ هکټاره نوي ځنګلونه جوړول د تېر مالي کال نورې کړنې دي.
د کرنې وزارت په ۱۳۹۸یم کال کې، د کرنې د وجهي صندوق له لارې، څه باندې څلور زره بزګرانو ته نږدې ۱.۱ میلیارډه افغانۍ پور ورکړی دی. ټاکل شوې، چې کرنې وزارت ۲۰۲۰ام کال کې ددې صندوق له لارې پانګوالو او بزګرانو ته ۱.۵ میلیارډه افغانۍ پور وکړي.
