د کرنې وزارت او د ملګرو ملتونو د خوړو او کرنې ادارې ترمنځ د همغږۍ غونډه ترسره شوه
د کرنې، اوبو لګولو او مالدارۍ وزارت او د ملګرو ملتونو د خوړو او کرنې ادارې «افاېاو» ترمنځ د همغږۍ غونډه د اوبولګولو او قدرتي سرچینو مرستیال مولوي بازمحمد فیضان په مشرۍ د اوبولګولو او قدرتي سرچینو په معینیت کې ترسره شوه.
په دې غونډه کې مولوي بازمحمد فیضان د پروژو د ښه تطبیق په موخه د کرنې وزارت او د ملګرو ملتونو د خوړو او کرنې ادارې ترمنځ د همکاریو او همغږۍ پر زیاتوالي ټینګار وکړ.
د ملګرو ملتونو د خوړو او کرنې ادارې چارواکو څرګنده کړه، چې په روان میلادي کال کې د هېواد په مرکز او ولایتونو کې د ۳۴۳ پروژو د پلي کېدو پلان شته. د هغوی د معلوماتو له مخې، په دغو پروژو کې د اوبولګولو کانالونو جوړول او بیارغونه، د چکډېمونو جوړول، د سیندونو د غاړو استحکامات، د څاڅکي اوبولګولو سیستمونو نصب، د ځنګلونو بیارغونه، د کرنیزو ځمکو لېزر لېول کول او د کاریزونو بیارغونه شامل دي.
یاد فعالیتونه په ځانګړې توګه د اوبولګولو د سکتور لپاره طرحه شوي، چې موخه یې په هېواد کې د کرنیزو بنسټیزو زېربناوو ښه کول او د اوبو د سرچینو د اغېزمنې ګټې اخیستنې زیاتول دي.
