هلمند کې د کرنیزو درمل پلورونکو او کاروباریانو سره ناسته وشوه
دهلمند ولایت د کرنې، اوبولګولو او مالدارۍ ریاست اړوند د کرنیزو چارو آمر مولوي محمد شریف احسان په مشرۍ ، په دې ولایت کې دکرنیزو شرکتونو او درمل ځایونو د معیاري کولو په موخه د هغوی له استازو سره ناسته وشوه.
په یاده ناسته کې د هلمند د کرنې ریاست اړوند د پلان او برنامو د همغږيۍ مدیر انجنیر امان الله تسکین او د بوټیو ساتنې مدیر انجنیر نجیب الله حکیمي په ګډون د نباتي او حیواني درملتونونو مسؤلینو او کارکوونکو برخه لرل.
په غونډه کې ګډونوالو ته د هلمند کرنې ریاست چارواکو لخوا لازمې سپارښتنې وشوې او یادونه وشوه، چې د هلمند د کرنې ریاست چارواکو هڅې پیل کړي دي، چې په دې ولایت کې د نباتي درملو د پلور شرکتونه او درملتونونه د کرنې وزارت د ځانګړې تګلارې له مخې په فني او مسلکي ډول را جوړ کړي، ترڅو ځمکوالو ته باکیفیته خدمات وړاندې شي، د غیر مسلکي کسانو، بې جوازه کاروباریانو او تر وخت تېر او بې کیفیته درملو مخه ونیول شي.
دوی همدا راز وویل: «د هلمند دکرنې اداره د خصوصي سکتور د پیاوړتیا لپاره د هر ډول مرستې او همکاریو ژمنه کوي ترڅو په دې برخه کې ځمکوال، بڼوال او مالدار د بهبود پر لور ولاړ شي او له دې لارې د باکیفیته خدمتونو څخه برخمن شي».
دغه راز په دې غونډه کې ګډونوالو ته سپارښتنه وشوه، چې د نباتي درملو ټولو خصوصي شرکتونه او در مل پلورونکي چې د کار کولو جواز نلري باید جواز ترلاسه کړي او هغه کسان چې جوازونه یې تر وخت تیر وي نوي یې کړي .
یادو کسانو ژمنه وکړه، چې خپل ټول فعالیتونه به د کرنې ریاست د فني او مسلکي کارمندانو د لارښؤنې او د اړونده ادارې د کړنلارې سره سم عیاروي او په دې برخه کې د کرنې ریاست څخه د ملاتړ او همکاري هېله لري.
د یادولو وړ ده، چې د هلمند د کرنې ریاست اداره هڅه کوي چې هلمند کې دغه ډول ټول مرکزي او سیمه ییز مرکزونه معیاري او په ټولو مسلکي شرایطو برابر کړل شي، ترڅو بزګرو او مالدارو ته معیاري او مسلکي خدمات وړاندې او د راتلونکو احتمالي خطراتو مخه ونیول شي .
