کندهار کې په درې زره مالدارانو د څارویو خوراکي توکو د وېش لړۍ پيل شوی دی
۱۲ چنګاښ ۱۴۰۰
د کندهار دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې (FAO) په همکارۍ ددې ولایت پر درې زره وچکالۍ ځپلو مالدارانو د څارویو خوراکي توکي وېشي.
دا خوراکي توکي د سیمه ییزو چارواکو له خوا ددې ولايت په درې ولسواليو کې پر درې زره وچکالۍ ځپلو مالدارانو وېشل کېږي، چې په ترڅ کې به يې هر مالدار ته ۲۰۰ کيلوګرامه د څارويو خوراکي توکي ورکړل شي.
کندهار کې، پر وچکالۍ ځپلو مالدارانو د څارويو د خوراکي توکو وېش د دامان له ولسوالۍ څخه پيل شوې، چې موخه يې د وچکالۍ ځپلو مالدارانو د څارويو خوندي کول، د مالدارانو ملاتړ او د مالدارۍ پراختيا او ودې ته زمينه برابرول دي.
بايد وويل شي،چې دکرنې وزارت د همکارو بنسټونو په مرسته د يوې طرحې پر اساس په ټول هېواد کې پر وچکالۍ ځپلو مالدارانو د څارويو د خوراکي توکو د وېش لړۍ پيل کړی دی، چې تر دې دمه زرګونه مالداران ترې برخمن شوي دي
