دکندهار دکرنې ریاست: د انارو سږنۍ حاصل لس سلنه زیاته شوې
![دکندهار دکرنې ریاست: د انارو سږنۍ حاصل لس سلنه زیاته شوې](https://www.mail.gov.af/sites/default/files/2020-08/118373000_3557359284288646_5512614585345371231_o.jpg)
دکندهار دکرنې ریاست:
د انارو سږنۍ حاصل لس سلنه زیاته شوې
۴ وږی ۱۳۹۹
د کندهار د کرنې، اوبولګولو او مالدارۍ ریاست وایي، چې ددې ولایت د انارو سږنۍ حاصلات د کمیت او کیفیت له پلوه ښه او ډېر شوي دي. یاد ریاست وایي، چې ددې ولایت په نهه زره او ۵۰۰ هکټاره ځمکه کې د انارو بڼونه جوړ شوي دي، چې سږنۍ حاصلات به یې ۱۹۰ زره ټنو ته ورسیږي.
د کندهار دکرنې رییس سیدحفیظ الله سیدي وایي، چې بڼوالو سره د کرنې ریاست تخنیکي او فني سلامشورې، همکارۍ او مرستې سږکال په دې ولایت کې د نارو بڼونو حاصلات ډېر کړي دي. د ښاغلي سیدي په خبره په ۱۳۹۸ یم کال کې ددې ولایت د انارو ټولیز تولید ۱۷۸ زره او ۱۲۵ ټنه وه خو سږکال به دا شمېره ۱۹۰ زره ټنو ته پورته شي، چې د تېر کال په پرتله لس سلنه زیاتوالی ښیي.
د کندهار ولایت بڼوال د خپلو بڼونو د انارو له حاصلاتو خوښ دي، خو د مناسب بازار له نشتون سرټکوي. دوی وایي که چېرې د انارو د بازار موندنې په برخه کې له دوی سره مرستې او همکارۍ ووشي نو د دوی عواید به څو چنده زیات شي.
د کندهار د دامان ولسوالۍ یوتن بڼوال عبدالرحمان وایي، چې د انارو د بڼ حاصلات یې کال تر بلې په ښه کېدو دي، هغه په خپل بڼ کې یوشمېر ځوانانو ته د کار زمینه هم برابره کړې ده، هغه اوس د خپلې بڼوالۍ څخه ځکه خوښ دی، چې حاصل به یې تر نړیوالو مارکېټونو رسیږي.
په ورته وخت کې د کندهار دکرنې ریاست وایي، چې دوی د بڼوالو او بزګرانو عوایدو زیاتولو په پار تل هلې ځلې کوی او داسې لارې چارې لټوي، چې ورسره د بڼوالو محصولاتو پلور ته لار هواره شي. د چارواکو په خبره د بڼوالو د محصولاتو د بازارموندنې په پار د نورو هلوځلو ترڅنګ بڼوالو ته د پروسس او بسته بندي په هکله روزنیزې برنامې په لاره اچولي دي ترڅو د دوی محصولات نړیوالو بازارونو ته لار پیدا کړي. دغه راز د کرونا په پېر کې د کندهاري بڼوال د انارو د خوساکېدو د مخنیوي په پار په دې ولایت کې د انارو د ۵۲ سړوخونو د جوړولو چارې هم روانې دي، چې په بشپړېدو سره به یې د بڼوالو محصولات خوندي شي.
په وروستیو کلونو کې د کرنې وزارت او د کندهار د خلکو په هلو ځلو ددې ولایت په څه باندې نهه زره او ۵۰۰ هکټاره ځمکه کې د انارو بڼونه جوړ شوي دي. د ارغستان او ارغنداب ولسوالۍ د کندهار تر ټولو ډېر انار تولیدوی.
د روان کال په ترڅ کې د کرنې، اوبولګولو او مالدارۍ وزارت په کندهار کې د انارو ډېر شمېر بڼونه جوړ کړي دي.د بڼوالو روزنه، د ګیاوو د ناروغیو کنټرول، د درملو تجویز او د بڼوالو حاصلاتو ته بازار موندنه نور هغه کړنې دی، چې سږ کال د کرنې وزارت له خوا په دې ولایت کې ترسره شوي دي.
دا مهال په کندهار کې د سور انارو په نوم یوه فبریکه هم د کرنې، اوبولګولو او مالدارۍ وزارت په همکارۍ په کار پېل کړی، چې د انارو له دانو څخه معیاري جوسونه جوړه وي او د هېواد بېلابېلو سیمو ته یې صادروي، یاد د انارو فبریکه د انارو د جوسونو تر څنګ د انارو پروسس هم کوي او له پوټکي څخه یې په صنعت کې ګټه پورته کوي.
په کندهار کې بېلابېلې مېوې شتون لری. د کندهار انار نړیوال شهرت لری. د کرنې وزارت هلې ځلې او د خلکو لېوالتیا ددې لامل شوې، چې کندهار په دې برخه کې د پام وړ پرمختګ وکړي.د کندهار انار د کورنیو بازارونو ترڅنګ یو شمېر ګاونډیو هېوادنو او په دې وروستیو کې د هوایي دهلیزونو له لارې نړیوالو مارکېټونو ته هم لار پیدا کړی.
انار؛ هغه مېوه ده چې له خوړلو پرته یې ان په لیدلو د انسان زړه تازه کېږي او د خوښۍ احساس ورکوي. انار د زړه ناروغیو، لوړ فشار، التهاب او ځینو سرطانونو، په تېره بیا د پروستات سرطان لپاره تر ټولو ښه نسخه ده. انار د فیبر اصلي سرچینه ګڼل کېږي او په زیاته اندازه ويټامین اې، سي، اي، اوسپنه او انتي اکسیدان لري.