د قدرتي سرچینو لوی رییس د ګذرګاه اول له کرنیز بڼ څخه لیدنه وکړه
۲۰ لړم ۱۴۰۵ هـ.ش
۱ جُمَادَى الثانی ۱۴۴۸ هـ.ق
د افغانستان اسلامي امارت د کرنې، اوبولګولو او مالدارۍ وزارت د قدرتي سرچینو لوی رییس مولوي حسین احمد مدني، د دغه وزارت د اطلاعاتو، عامه پوهاوي رییس او ویاند مولوي شیرمحمد حاتمي او د قدرتي سرچینو لوی ریاست یو شمېر کارکوونکو په ملتیا، د ګذرګاه اول له کرنیز بڼ څخه لیدنه وکړه.
د دې لیدنې په ترڅ کې د یاد بڼ بېلابېلې برخې له نږدې وکتل شوې او مسؤولینو د ونو له وضعیت، د هغوی د ودې له بهیر او د ساتنې او پالنې له څرنګوالي څخه ځانونه خبر کړل.
مولوي حسین احمد مدني د بڼ له کارکوونکو سره د لیدنې پر مهال د ونو پر منظمې ساتنې او پالنې، د بڼ اړتیاوو ته پر رسېدنې او له شته امکاناتو څخه د غوره ګټې اخیستنې ټینګار وکړ او له هغوی یې وغوښتل، چې د لا زیاتو هڅو او کاري مسؤولیتپذیرۍ له لارې د دغه بڼ په سمسورتیا او د وضعیت په ښه والي کې ونډه واخلي.
نوموړي همدارنګه د شنو سیمو په پراختیا، د بڼوالۍ د فرهنګ په دودولو او د هېواد د قدرتي سرچینو په ساتنه کې د کرنیزو بڼونو پر ارزښت ټینګار وکړ.
دغه لیدنه د بڼ د وضعیت ارزونې، د ترسره شویو فعالیتونو په اړه د معلوماتو ترلاسه کولو او د هغه د ساتنې او پالنې د بهیر د ښه والي په موخه ترسره شوه.
