افغانستان کې د چرګانوپالنې د صنعت د پراختیا په اړه غونډه ترسره شوه
۲۸ تله ۱۴۰۵ هـ.ش
۸ جُمَادَى الأول ۱۴۴۸ هـ.ق
د کرنې، اوبولګولو او مالدارۍ وزارت د کرنې او مالدارۍ مرستیال مولوي صدراعظم عثماني په مشرۍ، د ریاستالوزراء د اقتصادي معاونیت، مالیې او صنعت او سوداګرۍ وزارتونو، د کرنې او مالدارۍ خونې، د چرګانو پالنې ټولنې او خصوصي سکټور د استازو په ګډون، په هېواد کې د چرګانو روزنې د صنعت د پراختیا د لارو چارو د ارزونې په موخه غونډه ترسره شوه.
مولوي صدراعظم عثماني وویل، چې د اسلامي امارت موخه په هر ډول شرایطو کې د چرګانو روزنې د سکټور پراختیا ده، څو له دې لارې د خلکو په ژوند کې مثبت بدلونونه رامنځته شي او په هېواد کې دننه د صحي او سالمو خوراکي توکو د تولید زمینه برابره شي.
په دې غونډه کې ګډونوالو د چرګوړو، د چرګانو غوښې، هګیو او د چرګانو د خوراکي توکو د تولید د زیاتوالي، همداراز د مورنیو چرګانو د روزنې د مرکزونو (مادر سټاک) او د چرګوړو د ایستلو د مرکزونو (هېچریو) د جوړولو په اړه بحث او د نظرونو تبادله وکړه.
همداراز، ګډونوالو د صنعتکارانو، دولتي ادارو او سوداګرو ترمنځ پر همغږۍ او ګډې همکارۍ ټینګار وکړ او ژمنه یې وکړه، چې د متقابلو همکاریو له لارې به په افغانستان کې د چرګانو پالنې د صنعت د لا ودې او پرمختګ لپاره زمینه برابره کړي.
