د سړخونو د مېکانیزم مسودې د وروستي کولو په موخه، تخنیکي او د همغږۍ غونډه ترسره شوه
۲ وږی ۱۴۰۵ هـ.ش
۱۰ رَبِیعُ الْأَوَّل ۱۴۴۸ هـ.ق
د سړخونو د مېکانیزم د مسودې او ترې د ګټې اخیستنې د څرنګوالي په اړه د همغږۍ او تخنیکي غونډه، د کرنې، اوبولګولو او مالدارۍ وزارت د پلان او پروګرامونو د همغږۍ د لوی رییس، د ریاست الوزراء د اقتصادي معاونیت د استازو، د پالیسۍ او سټراټیژۍ ریاست او د یاد وزارت د یو شمېر متخصصینو او سلاکارانو په شتون کې ترسره شوه.
دا غونډه د کرنې، اوبولګولو او مالدارۍ وزارت د پلان او پروګرامونو د همغږۍ د عمومي رییس مولوي عبدالعلي عمري په مشرۍ جوړه شوه.
د پلان او پروګرامونو د همغږۍ لوی رییس ګډونوالو ته د ښه راغلاست ترڅنګ، د سړخونو د مېکانیزم د مسودې د چمتو کولو له امله مننه وکړه او د هغې پر وروستي کولو یې ټینګار وکړ.
نوموړي د ګومارل شوې کمېټې له غړو وغوښتل، چې د مېکانیزم د وروستي کولو بهیر د خپلو کارونو په لومړیتوب کې راولي او د تخنیکي او مسلکي نظرونو په کارولو سره، د یو اغېزمن او د پلي کېدو وړ مېکانیزم د جوړولو زمینه برابره کړي.
په دې غونډه کې، ګډونوالو د مېکانیزم د مسودې، تخنیکي اړخونو او اړینو همغږیو په اړه بحث او د نظرونو تبادله وکړه او د هغې د ښهوالي او وروستي کولو لپاره یې خپل وړاندیزونه وړاندې کړل.
